დღეს თბილისის მერი, დავით ნარმანია საკრებულოს რიგგარეშე სხდომაზე წარდგება, თუმცა პარტიზანული მებაღეობა სხდომაზე დასწრებას არ აპირებს. ინფორმაცია ამის შესახებ On.ge-ს პარტიზანმა მებაღემ, მარიამ ბაქრაძემ მიაწოდა და აგვიხსნა, რომ პარტიზანების მერიაში მისვლას აზრი არ აქვს:

"ძალიან ბევრი ვიფიქრეთ ამაზე და გადავწყვიტეთ, რომ არ მივალთ. მიუხედავად იმისა, რომ ალეკო ელისაშვილსაც უნდოდა, რომ დავსწრებოდით, მაგრამ რამდენჯერაც ვყოფილვართ, უბრალოდ ნერვების შლა არის და წაგებულობის მეტს ვერაფერს ვერ ვიღებთ. აზრი არ აქვს ჩვენ მისვლას, ფორმალური ხასიათი ექნება. არც არავინ მოგვცემს ხმის ამოღების უფლებას და უბრალოდ ნერვები უნდა დაგვწყდეს".

ბაქრაძემ ასევე განგვიმარტა, რომ პარტიზანი მებაღეები ნარმანიას გადადგომასთან დაკავშირებულ მოთხოვნას არ უერთდებიან:

"კი, შეიძლება უკმაყოფილოები ვართ ნარმანიას მუშაობით, მაგრამ ჩვენი მთავარი მოთხოვნა სწორედ ის არის, რომ ქალაქის "მწვანე პოლიტიკას" ეკოლოგიისა და გამწვანების სამსახური განაგებს, თუმცა ისინი ამას ვერ ახორციელებენ. და თუ ვერ ახორციელებენ, მისმა უფროსმა და მოადგილემ უნდა დატოვონ თანამდებობა".

ბაქრაძის თქმით, ამ დროისთვის პარტიზანმა მებაღეებმა შიმშილობა შეწყვიტეს:

"გუშინ ელენესაც უთხრეს საავადმყოფოში, რომ მისი ფიზიკური შესაძლებლობების გამო, უნდა შეწყვიტოს შიმშილობა და შემდეგ მოვიფიქრეთ, რომ ამ ბრიყვი მთავრობის პირობებში არ გვინდა ჩვენი ჯანმრთელობა შევწიროთ".

ბაქრაძემ ასევე გვიამბო, რომ გასულ ღამეს მერიის უსაფრთხების სამსახურის წარმომადგენლებმა პარტიზან მებაღეებს კარვების გაშლის საშუალება არ მისცეს, თუმცა ჯგუფის წარმომადგენლებმა მერიასთან ღამით მაინც იმორიგევეს.

პარტიზანული მებაღეობა მერიასთან ყოფნას მანამ აპირებს, სანამ მათი მთავარი მოთხოვნა, გადადგეს ეკოლოგიისა და გამწვანების სამსახურის უფროსი და მისი მოადგილე, არ დაკმაყოფილდება.

დავით ნარმანია საკრებულოს სხდომაზე დღეს, 4 საათზე მივა. როგორც ენმ-ს წევრი, ირაკლი აბესაძე განმარტავს, დედაქალაქის მერმა თბილისში ხეების უკანონო ჭრასთან დაკავშირებით მოქალაქეებს პასუხი უნდა გასცეს

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს. სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.