საქართველოს ყოფილი პრემირ-მინისტრი, გიორგი კვირიკაშვილი ნაციონალური მოძრაობის წევრის ნიკა რურუას სამძიმარზე მივიდა.

კვირიკაშვილმა ჟურნალისტებს უთხრა, რომ, როცა ადამიანი ამ ქვეყნიდან მიდის, პოლიტიკური აზრთა სხვადასხვაობა აზრს კარგავს.

"მე ნიკოლოზს ვიცნობ არაერთი ათეული წელია, ახალგაზრდობიდან და ძალიან გული დამწყდა მისი წასვლის გამო. ჩვენი ცხოვრების გზები გაიყარა. პოლიტიკურადაც სხვადასხვა გუნდში აღმოვჩნდით. მაგრამ როდესაც ადამიანი მიდის, პოლიტიკური აზრთა სხვადასხვაობა აქტუალობას კარგავს. ამიტომ მინდა მთელი გულით მივუსამძიმრო მის ოჯახს, ახლობლებს და მეგობრებს. ძალიან გულდასაწყვეტია, რომ ამ ასაკში წავიდა ამ ქვეყნიდან", — განაცხადა კვირიკაშვილმა.

ნაციონალური მოძრაობის წევრი, პოლიტიკოსი ნიკა რურუა 50 წლის ასაკში გარდაიცვალა. მას ხვალ, 6 დეკემბერს დაკრძალავენ.

ნიკა რურუა საქართველოს მეექვსე მოწვევის პარლამენტის წევრი იყო ერთიანი ნაციონალური მოძრაობის საარჩევნო სიიდან. ასევე იკავებდა კულტურის, ძეგლთა დაცვისა და სპორტის მინისტრის თანამდებობას. მისი ინიციტივით დაარსდა საქართველოში საბჭოთა ოკუპაციის მუზეუმი.

პარლამენტის წევრობისას იყო თავდაცვისა და უშიშროების კომიტეტის თავმჯდომარის პირველი მოადგილე და იურიდიულ საკითხთა კომიტეტის წევრი, ასევე ნატოს საპარლამენტო ასამბლეაში საქართველოს პარლამენტის დელეგაციის თავმჯდომარე.