ბრიტანული სამეცნიერო ფანტასტიკური ტელესერიალი Black Mirror მეხუთე სეზონით ბრუნდება, თუმცა ამის შესახებ ოფიციალური ინფორმაცია Netflix-მა ცოტა უცნაურად გვამცნო.

"სრულყოფილად დაბალანსებული დეკემბერი", - ასე ერქვა ნეტფლიქსის მიერ დასათაურებულ ტვიტს, რომელიც გამოქვეყნებიდან ცოტა ხანში წაიშალა.

ფოტო: Reddit

მისი მიხედვით, შავის სარკე ახალი სეზონით 2018 წლის 28 დეკემბერს [კი, 25 დღეში!] ბრუნდება. აღსანიშნავია, რომ შოუს მეოთხე სეზონი გასული წლის ასევე ბოლო პარასკევს [2017 წლის 29 დეკემბერი] გამოვიდა.

პირველი ეპიზოდის სახელი Bandersnatch იქნება. ბანდერსნაჩი ლუის კეროლის 1872 წლის ნოველისა და 1874 წლის პოემის ერთ-ერთი გმირია, რომელიც ძალიან სწრაფად გადაადგილდება.

ოქტომბერში ბლუმბერგმა დაწერა, რომ სერიალი ეთერში ამ წლის დეკემბერში დაბრუნდებოდა, ხოლო ერთ-ერთ ეპიზოდში მაყურებელი სიუჟეტს სრულად გააკონტროლებდა.

Black Mirror-ის ყოველი ეპიზოდი ცალკე ფილმია, რომლის მოქმედება ძირითადად ახლო მომავალში მიმდინარეობს და მათში მსახიობების განსხვავებული შემადგენლობა თამაშობს. განსხვავებულია მოქმედების ადგილიცა და სცენარიც. სერიალში ნაჩვენებია თანამედროვე საზოგადოება, განსაკუთრებით კი, მასზე ტექნოლოგიების ზემოქმედების შედეგი.