თბილისის მერის, კახა კალაძის განცხადებით, ძალადობა არავისთვის მისაღები არ არის, თუმცა ძალიან სამწუხაროა. ასე გამოეხმაურა კახა კალაძე გაერთიანებული ოპოზიციის მხარდამჭერზე, თაკო ჩარკვიანზე თავდასხმის ფაქტს.

მისი თქმით, მთელი არჩევნების განმავლობაში ყურადღებას ამახვილებდა, რომ პირდაპირი ეთერიდან შეურაცხყოფა, მათ შორის დედის გინება, მიუღებელია.

"დათო[მაჭავარიანი] უპატიოსნესი ადამიანია, მართლაც. მაგ ადამიანზე კარგის მეტი არაფრის თქმა არ შემიძლია. ძალადობა არავისთვის მისაღები არ არის, თუმცა ძალიან სამწუხაროა და მე ამაზე ყველა ჩემს გამოსვლაში და ინტერვიუსი მივუთითებდი, რომ კატეგორიულად მიუღებელია, რაც ხდებოდა მთელი არჩევნების განმავლობაში. პირდაპირ ეთერიდან დედის გინებაზე იყვენენ გადასული და არავის უნდა გაუკვირდეს, რომ ვიღაცა ვიღაცას შეურაცხყოფას მიაყენებს", — განაცხადა კალაძემ.

ჟურნალისტის კითხვაზე, იწვევს თუ არა აგრესიას ტელევიზიის ეკრანებიდან წამოსული "ლანძღვა", კალაძე პასუხობს, რომ "რასაც დასთეს, იმას მოიმკი".

ის დასძენს, რომ ძალადობა და ბულინგი კატეგორიულად მიუღებელია და სწორედ ამას აკეთებს, მისივე თქმით, რუსთავი 2-ის გენერალური დირექტორი, ნიკა გვარამია.

"იმუქრებოდა ყველას დაგთვლითო, ვინ უნდა დათვალოს გვარამიამ, ან ვინ უნდა ჩარეცხოს გვარამიამ?", — ამბობს კახა კალაძე.

შინაგან საქმეთა სამინისტრომ ამ ინციდენტში ბრალდებული სამი პირი ადმინისტრაციული წესით დააკავა, ხოლო ერთი სისხლის სამართლის წესით. სწორედ ადმინისტრაციული წესით დაკავებულ სამ პირს შორის იყო დავით მაჭავარიანი. ის სასამართლომ გაამართლა იმ არგუმენტით, რომ ინციდენტის მონაწილეებს აშველებდა.