საქართველოს ახალგაზრდა იურისტთა ასოციაციის თავმჯდომარე, სულხან სალაძე მიიჩნევს, რომ სასამართლომ ცუდი პრაქტიკის დამკვიდრება დაიწყო. ასე შეაფასა სალაძემ სასამართლოს მიერ ზაზა სარალიძისთვის კარვების გაშლის აკრძალვის საქმის განხილვის შეწყვეტა.

"თუ ოდესმე ვინმე მოინდომებს კარვის გაშლას, არ აქვს მნიშვნელობა რუსთაველზე იქნება თუ სხვა რომელიმე ადგილას სამინისტრო ეტყვის, რომ არ გაგაშლევინებთ კარავს, რადგან გვაქვს ოპერატიული ინფორმაცია, რომ აქ რაღაც იგეგმება. ამის შემდეგ, 2-3 თვის თავზე სასამართლო დაიწყებს განიხილავს, შემდეგ კი შეწყვეტს, რადგან თქვენ უკვე გექნებათ კარავი გაშლილი", — განმარტავს სულხან სალაძე.

ზაზა სარალიძისთვის კონსტიტუციური უფლების, კარვის გაშლის უფლების შეზღუდვის გამო 10 ნოემბერს აქცია გამართეს არასამთავრობო ორგანიზაციებმა. პოლიციის წინააღმდეგობის მიუხედავად, თბილისში, რუსთაველის გამზირზე, პარლამენტის შენობის წინ არასამთავრობოებმა პროტესტის ნიშნად კარვები მაინც გაშალეს. ასევე შეიქმნა პეტიცია "უარს ვამბობ ნაძვის ხეზე, ვირჩევ ადამიანს!"

თბილისის მერმა, კახა კალაძემ ბრიფინგი გამართა, სადაც განაცხადა, რომ დეზინფორმაციაა, თითქოს სარალიძეს კარვის აღება საახალწლო ნაძვის ხის გამო მოსთხოვეს. მისი თქმით, ეს იყო რეკომენდაცია, რომლის გათვალისწინებაც აქციის მონაწილეების პრეროგატივაა. ზაზა სარალიძის თქმით, კახა კალაძე თავის მართლების პოზიციაშია და თავისი ნათქვამის გამოსწორებას ცდილობს.