"არ გაქვს უფლება იყო მერი" - აქციის მონაწილეები ამ შეძახილებით დღეს, თბილისის მერს, დავით ნარმანიას სასტუმროს გახსნაზე დახვდნენ.

აქცია სამართლის თაობის წარმომადგენლებმა მოაწყვეს. მათ მიაჩნიათ, რომ ნარმანიამ თანამდებობა უნდა დატოვოს.

"მითხარით რა მორალური უფლება გაქვთ, რომ თქვენ იმყოფებოდეთ დედაქალაქის მერიის სათავეში? რა ნამუსით ხართ თქვენ დედაქალაქის მერი და არ მიდიხართ, არ ტოვებთ პოსტს?- აქტივისტმა ამ კითხვით ქალაქის მერს მიმართა, თუმცა პასუხი ვერ მიიღო.

დავით ნარმანიამ ჟურნალისტებთან საუბარში აღნიშნა, რომ გადადგომას არ აპირებს და არ არსებობს საფუძველი იმისა, რომ მისი გადადგომა მოითხოვონ.

"საკრებულოში მივალ ხვალ და გავაკეთებ ძალიან საინტერესო განცხადებებს, ძალიან საინტერესო ინფორმაციებს და ვუპასუხებ ყველა დასმულ კითხვას."

გარდა ამისა ნარმანია კიდევ ერთხელ გამოეხმაურა გუშინდელ შეხვედრას და საზოგადოებას ბოდიში მოუხადა.

"ცალკეული ადამიანების მხრიდან დესტრუქციულ მოქმედებებს ჰქონდა ადგილი, ამან გამოიწვია ეს რეაქცია. თუმცა, მე ვთვლი, რომ არ უნდა გამეკეთებინა ასეთი ტიპის ფრაზები და გამომეჩინა
ის თმენის ვალდებულება, რომელიც საჯარო მოხელეს უნდა ჰქონდეს. ძალიან ვწუხვარ და ბოდიშს ვუხდი საზოგადოებას. გადადგომის საფუძველი არ არსებობს,"