ქუთაისის საქალაქო სასამართლოში პუბლიცისტ თაკო ჩარკვიანსა და მის ქმარზე თავდასხმაში ადმინისტრაციული წესით დაკავებული სამი პირის სასამართლო პროცესი გაიმართა. მოსამართლის გადაწყვეტილებით, გიორგი კერვალიშვილი და დავით ბაიდარაშვილი 700 ლარით დაჯარიმდნენ, საკრებულოს პროტოკოლის ხელმძღვანელის, დავით მაჭავარიანის ბრალეულობა კი არ დადასტურდა.

დაკავებულების თქმით, მათ ჩხუბი არ დაუწყიათ, უბრალოდ, აეროპორტში ჩოჩქოლის ხმა მოესმათ, რა დროსაც გასაშველებლად მივიდნენ, თუმცა რას მოჰყვა კონფლიქტი, მათთვის უცნობია. მათი მტკიცებით, პოლიტიკური ნიშნით დევნა გამორიცხულია, რადგან ისინი აეროპორტში შეფერხებული რეისის გამო იმყოფებოდნენ.

ბრალდებულების თქმით, ისინი ბარსელონადან ჩამოფრინდნენ და ბარგს ელოდებოდნენ, რადგან გუშინ უამინდობის გამო, ბარგის თვითმფრინავიდან ჩამოტვირთვა ვერ მოხერხდა.

ადმინისტრაციული წესით დაჯარიმებულები აპირებენ გადაწყვეტილება სააპელაციო სასამართლოში გასააჩივრონ. მომდევნო პროცესი 12 დეკემბერს ჩაინიშნა.

სისხლის სამართლის წესით დაკავებულის პროცესი კი ჯერ არ გამართულა.

დღეს, პირველ დეკემბერს გრიგოლ ვაშაძის მხარდამჭერს, თაკო ჩარკვიანსა და მის თანმხლებ პირს, სავარაუდოდ, პოლიტიკური მოტივით თავს დაესხნენ. შსს-მ ოთხი პირი დააკავა.