რუსეთის პრეზიდენტის, ვლადიმერი პუტინის დავალებით, ქვეყანაში სამხედრო მზადყოფნის მოულოდნელი შემოწმება დაიწყო. ინფორმაციას ამის შესახებ Ekhokavkaza ავრცელებს.

როგორც რუსეთის თავდაცვის მინისტრმა, სერგეი შოიგუმ განაცხადა, აღნიშნული პროცესი 25 აგვისტოს დაიწყება და 31 აგვისტოს დასრულდება. მისი თქმით, შემოწმება სამხრეთ, დასავლეთ და ცენტრალური სამხედრო ოლქებში, ჩრდილოეთის ფლოტში, საჰაერო-კოსმოსური ძალების და საჰაერო-სადესანტო ჯარების მთავარ სამეთაურო შტაბებში მიმდინარეობს.

2014-2015 წლებში, რუსეთის მიერ ყირიმის ნახევარკუნძულის ანექსიისა და უკრაინასთან კონფლიქტის დაწყების შემდეგ, რუსეთმა დიდი რაოდენობით მსგავსი შემოწმება და სამხედრო სწავლებები ჩაატარა.

უკრაინის მხარე მაშინ აცხადებდა, რომ ამ შემოწმებების შედეგად, ორ ქვეყანას შორის საზღვართან რუსი სამხედროების რაოდენობა გაზრდილი იყო. მათივე თქმით, ამის შემდეგ დონბასში არსებული სიტუაცია კიდევ უფრო დაიძაბა.

რუსეთში უკანასკნელი ასეთი შემოწმება ივნისის შუა რიცხვებში განახორციელეს.