ჰოლანდიის ერთ-ერთი ეკლესიაში სასულიერო პირები 800 საათზე მეტია წირვას მართავენ, რათა სომეხი ოჯახი დეპორტაციას გადაარჩინონ. ჰოლანდიის კანონმდებლობის მიხედვით, პოლიციელებს ეკლესიაში წირვის დროს შესვლა არ შეუძლიათ. ამის გამო უკვე ერთ თვეზე მეტია, რაც ასობით პასტორი ერთმანეთს ენაცვლება და ოჯახს იცავს.

თამრაზიანების ოჯახმა სამი ბავშვით სომხეთი 2010 წელს დატოვა და ჰოლანდიაში პოლიტიკური თავშესაფარი მოითხოვა, რაზეც ქვეყანამ უარი უთხრა. 21 წლის ჰაიარპი თამრაზიანი ამბობს, რომ ის "ძალიან ბედნიერია და წირვაში ჩართვისთვის ყველა მოხალისეს მადლობას უხდის".

უწყვეტი წირვის ერთ-ერთი ინიციატორის თქმით, იმისთვის, რომ ოჯახს საფრთხე არ შექმნოდა, იდეის შესახებ თავიდან ძალიან ცოტა ადამიანმა იცოდა. წირვის გამო ეკლესიას პოლიციელები გაძლიერებულად აკვირდებიან.