"სახელმწიფომ მოკლა დემურ სტურუა" - თეთრი ხმაურის მოძრაობის ორგანიზებულ აქციაზე 187-ე მუხლით (ნივთის დაზიანება ან განადგურება) იმერეთის სამხარეო სამმართველომ გამოძიება დაიწყო. ინფორმაცია On.ge-ს უწყებამ დაუდასტურა.

22 წლის დემურ სტურუამ პოლიციის მხრიდან სავარაუდო ზეწოლის გამო თავი მოიკლა. სტურუამ წერილი დატოვა, სადაც პოლიციელის მიერ მის მიმართ განხორციელებულ მუქარაზე წერს.

20 აგვისტოს თეთრი ხმაურის მოძრაობამ სამტრედიის პოლიციის შენობასთან აქცია გამართა. სადაც მათი მოთხოვნები გააჟღერეს:

  1. პასუხისმგებლობაში მიეცეს პოლიციელი გოდერძი თევზაძე და მისი მეწყვილე, რომლის ვინაობასაც პოლიცია ამ დრომდე ასაიდუმლოებს;
  2. თანამდებობა დატოვოს სამტრედიის რაიონული პოლიციის უფროსმა;
  3. შსს-ს მინისტრმა საზოგადოებრივი ორგანიზაციების მონაწილეობით შექმნას მონიტორინგის ჯგუფი, რომელიც თბილისსა და რეგიონებში პოლიციის მხრიდან ძალის გადამეტებისა და შანტაჟის პრაქტიკებს შეისწავლის;
  4. დაუყოვნებლივ გადაიდგას ქმედითი ნაბიჯები რეპრესიული ნარკოპოლიტიკის შესაცვლელად".

აქციაზე მოხდა დაპირისპირებაც. აქტივისტებმა ფერადი კვამლი გაუშვეს, რასაც პოლიციასა და აქტივისტებს შორის ფიზიკური დაპირისპირება მოჰყვა.