New York Times ვრცელ კრიტიკულ სტატიას უძღვნის ფეისბუქს, სადაც წერს, რომ პოპულარული სოციალური ქსელი კრიზისულ სიტუაციებს არაჯანსაღად უდგება. სტატიის მიხედვით, მარკ ცუკერბერგმა თავის თანამშრომლებს ანდროიდის გამოყენება მოსთხოვა, მას შემდეგ, რაც ეფლის დირექტორმა ტიმ კუკმა ფეისბუქი საჯაროდ გააკრიტიკა.

სტატიის მიხედვით, ფეისბუქის გენერალური დირექტორის გაღიზიანება კუკის საჯარო განცხადებამ გამოიწვია და სწორედ ამის შემდეგ, ფეისბუქის მენეჯმენტის წევრებს აიფონის მოდელის გამოყენებაზე უარის თქმა მოუწიათ.

2018 წლის მარტში, MSNBC-სთან ინტერვიუში, ჟურნალისტის კითხვაზე, რას იზამდა, ცუკერბერგის ადგილზე რომ ყოფილიყო, ეფლის დირექტორმა თქვა, რომ ის მის სიტუაციაში არ აღმოჩნდებოდა:

"ჩვენ თქვენ პერსონალურ ცხოვრებაში არ აგედევნებით, რადგან ჩვენთვის პირადი ინფორმაციის უსაფრთხოება ადამიანის უფლებაა. ეს სამოქალაქო თავისუფლებაა".

ნიუ-იორკ ტაიმსი ასევე წერს, რომ ცუკერბერგმა დაიქირავა საჯარო ურთიერთობების კომპანია, რომლის თანამშრომლებსაც Apple-ის შესახებ ნეგატიური სტატიების წერა დაავალა.

15 ნოემბერს ფეისბუქმა გამოაქვეყნა განცხადება, სადაც კომპანია ადასტურებს, რომ თანამშრომლებს ანდროიდზე გადასვლას ურჩევს, თუმცა მხოლოდ იმიტომ, რომ ის "მსოფლიოში ყველაზე პოპულარული ოპერაციული სისტემაა".