ფოტოგრაფი იური მეჩითოვი, რომელმაც განაცხადა, რომ 9 აპრილს რუს სამხედროებს არავის მოკვლა არ სურდათ და ხალხი ასფიქსიით დაიღუპა, ბოდიშს იხდის. მისი ვიდეომიმართვა Youtube-ით გავრცელდა.

"საშინლად გული მტკივა, რომ ამდენი ტკივილი მივაყენე ჩემს თანამემამულეებს, ასეთი განცხადებები, რომელსაც არ ჰქონდა მიზეზი, ვინმესთვის ზიანი მიეყენებინა, მაგრამ ასე მოხდა. მე არ ვეძებ გამართლებას და არ ვამართლებ ჩემს თავს, რამეთუ ეს ტკივილი ნამდვილია", — ამბობს მეჩითოვი.

Al Jazeera-სთან ინტერვიუში მეჩითოვმა 9 აპრილის ტრაგედიაზე ისაუბრა და აღნიშნა, რომ პარლამენტის წინ შეკრებილებისთვის 9 აპრილი იყო შოუ და ახალგაზრდები სწორედ ამიტომ დარჩნენ მიტინგზე.

15 ნოემბერს გავრცელებულ ვიდეომიმართვაში მეჩითოვი ამბობს, რომ ინტერვიუში 30-წუთიანი საუბრიდან სამი წუთის გაშვებით 9 აპრილის მიმართ მის დამოკიდებულებაზე ცუდი შთაბეჭდილება შეიქმნა:

"იქ იყო უამრავი წუხილი გამოთქმული ამ ტრაგედიის მიმართ, რადგან მე მოწმე ვიყავი ამ ყველაფრის. იმ გადაღებულ სურათებში მოხვდა ერთი ადამიანი, რომელიც მერე მე შევნიშნე და შემძრა ამ სურათმა და გავაცნობიერე, რომ დღე-ნახევარში ის ადამიანი აღარ იქნება, მაგრამ ეს ყველაფერი დარჩა კადრის მიღმა, მთელი ეს ჩემი წუხილი, მთელი ეს ჩემი ცრემლი და დარჩა ის, რაც დარჩა".

როგორც მან განაცხადა, ბევრ რამეს იყენებენ პოლიტიკური მიზნებისთვის, თუმცა ის იზიარებს იმ რისხვას, რომელიც საზოგადოებას მის მიმართ გაუჩნდა.

"ძალიან გული მტკივა, რომ, აი, ეს ტკივილი მივაყენე ადამიანებს, ჩემს მეგობრებსაც, რომლებიც არც ელოდნენ, რომ ასეთი რამე მოხდებოდა და ასეთი რამე შეიძლებოდა მეთქვა. და ეს ჩემი გულწრფელი ბოდიში თუ შეაჩერებს ამ სამართლიან რისხვას, რომელიც მე ვიგრძენი და ბევრ რამეს ვიზიარებ, რაც იყო გამოქთმული ჩემ მიმართ, იქნება კარგი", — აღნიშნა მეჩითოვმა.

რამდენიმე დღის წინ მეჩითოვის ინტერვიუს გავრცელების შემდეგ გალერეა Fotografia-ში პირველ დეკემბერს დაანონსებული გამოფენა გადაიდო.

ამავე თემაზე: