თბილისის მერი, კახა კალაძე შენობების პირველ სართულზე განთავსებულ სავაჭრო ობიექტებს სთხოვს, რომ საახალწლოდ გარე ან შიდა ფასადები მორთონ და ერთი სათამაშო მაინც დაკიდონ, საახალწლო განწყობის შესაქმნელად. ამის შესახებ თბილისის მერმა, კახა კალაძემ მუნიციპალიტეტის მთავრობის სხდომაზე განაცხადა.

კალაძის თქმით, მას სურს გააგრძელოს გასულ წელს დაწყებული ინიციატივა და საახალწლო ილუმინაციების დამონტაჟებაში ბიზნესსექტორი ჩართოს.

"ბიზნესი უკვე აქტიურობს და აქვთ სურვილი კონკრეტული ადგილები მორთოს. მინდა, თხოვნით მივმართო ყველა პირველ სართულზე განთავსებულ სავაჭრო ობიექტებს, საახალწლოდ, გარე ფასადზე ან შიგნით, თითო სათამაშო იყოს ჩამოკიდებული, რომ საახალწლო განწყობა შეიქმნას", — განაცხადა თბილისის მერმა.

თბილისის მერმა, კახა კალაძემ გასულ წელს დაიწყო ინიციატივა, რომლის ფარგლებშიც სკვერებსა და კონკრეტულ ადგილებს დედაქალაქის მასშტაბით საახალწლოდ ბიზნესსექტორის წარმომადგენლები რთავდნენ.