პარტია ქართული ოცნების გენერალური მდივნის, კახა კალაძის განცხადებით, ნაციონალური მოძრაობისა და მისი რუსი პოლიტოლოგების ზრახვები საბოლოოდ გაცხადდა. მისი თქმით, ნაციონალური მოძრაობა რევოლუციურ სცენარს აწყობს, რასაც ხელისუფლება არ დაუშვებს. კახა კალაძეს დეტალებზე არ უსაუბრია და კითხვაზე, რის საფუძველზე აკეთებს მსგავსს განცხადებას, განაცხადა: "ყველა იმ ქმედებებისა და განცხადების საფუძველზე, რაც ბოლო დღეების განმავლობაში ხდება".

კალაძის თქმით, ნაციონალური მოძრაობა ხაზებს გასცდა და ქართულ ჯარსაც კი შეეხო.

"ისინი ყველაფერზე მიდიან და უკადრებელს კადრულობენ ხელისუფლების ხელში ჩასაგდებად. ჩვენ, როგორც პასუხისმგებლიანი პოლიტიკური ძალა, არ მივცემთ მათ არანაირ საშუალებას სიცრუეზე აგებული პროპაგანდით საკუთარი დანაშაულის ხელისუფლებაზე გადაბრალებით მუდმივ სტრესში ამყოფონ ჩვენი საზოგადოება, ამიტომ ყოველთვის ვამხელთ მათ სიცრუეს", — განაცხადა კალაძემ.

პარტიის გენერალური მდივანი ამბობს, რომ ხელისუფლება კარგად არის ინფორმირებული და მზადაა ნებისმიერ პროვოკაციაზე რეაგირებისთვის

"ჩვენ არასოდეს არ დავუშვებთ სააკაშვილის, ვაშაძისა და მისი რუსი პოლიტტექნოლოგების მიერ დაანონსებულ რევოლუციური გეგმების განხორციელებას ჩვენს ქვეყანაში, კანონიდან გადახვევის ნებისმიერი დარღვევის შემთხვევაში ისინი აგებენ პასუხს", — განაცხადა კალაძემ.

პირველი შემთხვევა არ არის, როცა მმართველი გუნდი ნაციონალური მოძრაობის მხრიდან რევოლუციისა და დესტაბილიზაციის საფრთხეზე საუბრობს. მას შემდეგ, რაც საპრეზიდენტო არჩევნებში მეორე ტური დაინიშნა, ქართული ოცნების დეპუტატმა, გედევან ფოფხაძემ სამოქალაქო დაპირისპირების სცენარზეც კი ისაუბრა. გედევან ფოფხაძის პოზიცია ქართული ოცნების დეპუტატების ნაწილმა არ გაიზიარა, თუმცა ისინი მუდმივად საუბრობენ დესტაბილიზაციის საფრთხეზე საქართველოში.