ქალაქ ქუთაიში ახლადრეაბილიტირებულ თეთრ ხიდზე ტერენტი გრანელის ლექსზე ავტორად შეცდომით მითითებული კოლაუ ნადირაძე წაშალეს და ციტატას რეალური ავტორის გვარი მიაწერეს. ამის შესახებ ინფორმაცია რადიო თავისუფლებამ გაავრცელა. გამოცემის ცნობით, შეცდომის გამოსწორების მიუხედავად ფილაზე ხარვეზები დარჩა.

3 ნოემბერს საზეიმოდ გახსნილი თეთრი ხიდი სპეციალური ჯებირებით დროებით ჩაკეტილია. რადიო თავისუფლება იუწყება, რომ გახსნიდან მალევე დაზიანდა მინისა და ლითონის კონსტრუქციების გადაბმის ადგილები და ამჯერად სილინოკით დამუშავების სამუშაოები გრძელდება.

თეთრი ხიდის სარეაბილიტაციო სამუშაოები ადგილობრივი ბიუჯეტიდან დაფინანსდა და მისი რეაბილიტაციისთვის 445 000 ლარი დაიხარჯა.