საქართველოს პროკურატურის პრესსამსახურმა On.ge-ს კითხვაზე, არის თუ არა იდენტიფიცირებული პირი, რომლის იძულებითაც ციხეში მირზა სუბელიანის საუბარი ჩაიწერა, არ უპასუხა. მათი თქმით, ამ ეტაპზე გამოძიება მიმდინარეობს და "მეტ დეტალს ვერ გვეტყვიან".

უპასუხოდ დარჩა კითხვა იმის შესახებაც, დაასახელა თუ არა სასჯელაღსრულების დაწესებულების თანამშრომელმა გამოკითხვისას ის პირი, რომელმაც საუბრის ჩაწერა აიძულა.

მიუხედავად იმისა, რომ ჩანაწერების გამოქვეყნებიდან მეორე დღეს, პროკურატურის თქმით, საზოგადოებრივი ინტერესიდან გამომდინარე ხალხის ინფორმირება ინტენსიურად მოხდებოდა, ამ ეტაპზე ისინი დეტალების გასაჯაროვებისგან თავის შეკავების მიზეზად გამოძიების მიმდინარეობას ასახელებენ.

14 ოქტომბერს რუსთავი 2-ის მიერ გავრცელებულ აუდიოჩანაწერში, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

"მირზა სუბელიანის ჩანაწერების" ჩანაწერების გავრცელების მეორე დღეს, 15 ოქტომბერს გამართულ ბრიფინგზე პროკურატურამ განაცხადა, პენიტენციური სამსახურის თანამშრომელს გავრცელების მიზნით აშანტაჟებდნენ. უწყებაში ამბობდნენ, რომ თანამშრომელს ფარული ჩანაწერების გავრცელება პირადი ცხოვრების ამსახველი კადრების გასაჯაროების მუქარით მოსთხოვეს.

ამავე თემაზე: