ქართული ოცნების დეპუტატის, მარიამ ჯაშის განცხადებით, მეორე ტურის თარიღის გამოცხადებას ელოდებიან, რის შემდეგაც სალომე ზურაბიშვილი აქტიურ საარჩევნო კამპანიას დაიწყებს.

დეპუტატი ამბობს, რომ პარალელურად დაწყებულია მუშაობა რეგიონებში, რათა პარტიის სათქმელი საზოგადოებამდე მიიტანონ.

"ჩვენ ველოდებით ოფიციალურად მეორე ტურის თარიღის გამოცხადებას, რის შემდეგაც სალომე ზურაბიშვილი აქტიურ, ძალიან ეფექტურ კამპანიას დაიწყებს და პარალელურ რეჟიმში უკვე დაწყებულია სამუშაო შეხვედრები რეგიონებში, რომ მაქსიმალურად ყველა რეგიონს ვეწვიოთ და ჩვენი სათქმელი მივიტანოთ ხალხამდე, იმ გზავნილის საპასუხოდ, რომელიც ჩვენ მივიღეთ პირველ ტურში და დარწმუნებულები ვართ, რომ მეორე ტურში იქნება დამაჯერებელი გამარჯვება", — განაცხადა დეპუტატმა.

მან ასევე თქვა, რომ სალომე ზურაბიშვილი ყოველდღიურ რეჟიმში არის ჩართული ქართული ოცნების ყველა ლიდერთან კონსულტაციებში.

"კამპანიის მეორე ფაზა დაიწყება უახლოეს პერიოდში, როგორც კი გახდება ცნობილი ოფიციალურად თარიღი არჩევნების მეორე ტურის. ეს იქნება ნამდვილად ძალიან ეფექტური, წარმატებული კამპანია და ბუნებრივია, ჩემი მთავარი მესიჯი, როგორც ერთი პარლამენტარის, არის მოსახლეობის მიმართ თხოვნა, რომ მაქსიმალური ჩართულობა იყოს მეორე ტურში. ეს არის ჩვენი ღირსების არჩევანი და გთხოვთ, რომ მეორე ტურში მაქსიმალურად ყველა ჩვენგანმა მივიღოთ მონაწილეობა", — განაცხადა ჯაშმა.

არჩევნების მეორე ტურის შედეგები გამოქვეყნების შემდეგ, მმართველი გუნდის მიერ მხარდაჭერილ კანდიდატს, სალომე ზურაბიშვილს საარჩევნო კამპანია არ განუახლებია და არც ამომრჩეველს შეხვედრია. ქართული ოცნების ოფისში კი ყოველდღიურად იმართება შეხვედრები პარტიის ლიდერებსა და რეგიონში მმართველი გუნდის წარმომადგეენლებს შორის. პარტიის თავმჯდომარემ ბიძინა ივანიშვილმა "ძველ გვარდიას" მხარდაჭერისკენაც მოუწოდა. ქართული ოცნების სხვა ლიდერები კი მათ შორის, კახა კალაძე და ირაკლი კობახიძე პარტიის ოფისში სხვადასხვა თემაზე ბრიფინგებს მართავენ. ქართულმა ოცნებამ გადაწყვიტა და არჩევნების მეორე ტურში საკუთარი შტაბიც ექნება. მთავარ შტაბს ირაკლი კობახიძე, ხოლო თბილისის შტაბს კახა კალაძე უხელმძღვანელებს.