საქართველოს ექს-პრეზიდენტი, ნაციონალური მოძრაობის ლიდერი, მიხეილ სააკაშვილი და ევროპული საქართველოს ერთ-ერთი ლიდერი, გიგი უგულავა ჰელსინკში ერთმანეთს შეხვდნენ. მიხეილ სააკაშვილის თქმით, ყველა მიხვდა, რომ "ერთი ოჯახი არიან".

მიხეილ სააკაშვილსა და გიგი უგულავას შორის საუბრის მთავარი თემა სწორედ არჩევნები იყო. სააკაშვილის განცხადებით, ევროპული საქართველოს მიერ გრიგოლ ვაშაძის მხარდაჭერა საქართველოში პოლიტიკურ კულტურას ამყარებს.

"გიგი უგულავას მადლობა ვუთხარი მართლა ძალიან მაგარი პოზიციის გამოხატვისთვის, რაც გააკეთეს გიგიმ და სხვა ლიდერებმა. ეს არის ახალი პოლიტიკური კულტურის ბოლომდე დამკვიდრება საქართველოში. მათ ჰყავთ ძალიან ბევრი აქტივისტი, მათ ჰყავთ ძალიან ბევრი გულწრფელი მომხრე და ყველანი მივხვდით, რომ საბოლოო ჯამში, ჩვენ ვართ ერთი ოჯახი, ჩვენ გვაქვს ერთი სამშობლო, გვაქვს ერთი სამიზნე, გვყავს ერთი მტერი და ჩვენი ქვეყანა გვაქვს გადასარჩენი. ახალი ერთობა იქმნება, ბევრად უფრო ფართო, ვიდრე ეს ორი პარტია და ბევრად უფრო ფართო, ვიდრე ჩვენი ურთიერთობებია", —განუცხადა მიხეილ სააკაშვილმა ტელეკომპანია რუსთავი 2-ს.

ეს არის პირველი კომუნიკაცია ორი ოპოზიციური პარტიის ლიდერს შორის მას შემდეგ, რაც ევროპულმა საქართველომ არჩევნების მეორე ტურში მხარდაჭერა გაერთიანებული ოპოზიციის კანდიდატს გრიგოლ ვაშაძეს გამოუცხადა. მიხეილ სააკაშვილსა და გიგი უგულავას შორის საუბრის მთავარი თემა სწორედ არჩევნები იყო.

2017 წლის 12 იანვარს ბრიფინგზე, რომელზეც ნაციონალური მოძრაობის გაყოფა დაანონსდა, გიგი უგულავამ მიხეილ სააკაშვილი გააკრიტიკა და განაცხადა, რომ ის არაა ნაციონალური მოძრაობის შემქმნელი, თუმცა პარტია მან დაშალა. თბილისის ყოფილმა მერმა ასევე თქვა, რომ სააკაშვილი "საკუთარი თავის პრობლემაა" და არა ქვეყნის.

"ეს მანქანა შეიძლება მოისროლო ჯართში", — განაცხადა უგულავამ.