პარლამენტის თავმჯდომარე, ირაკლი კობახიძე მიიჩნევს, რომ "სწორი საქციელი" არ არის, როცა ევროპული საქართველოს წევრები 7 ნოემბერს, ხორავას ქუჩის საქმეზე "ულტიმატუმებით გამოდიან".

ამით კობახიძე პარტიის ახალ რეზოლუციას გამოეხმაურა, სადაც ნათქვამია, რომ მმართველმა გუნდმა 10 დღის ვადაში შეასრულოს ხორავას ქუჩის საქმის საგამოძიებო კომისიის ძირითადი რეკომენდაციები.

დღეს, 7 ნოემბერს პარტიის ოფისში გამართულ ბრიფინგზე, ევროპული საქართველოს ლიდერმა დავით ბაქრაძემ ხელისუფლებას შეახსენა, რომ ორ თვეზე მეტია, რაც კომისიამ მუშაობა დაასრულა და მათი რეკომენდაციებიდან, არცერთი არ არის შესრულებული:

"განვლილი ორი თვის განმავლობაში ხელისუფლების მხრიდან არ გადადგმულა არცერთი ნაბიჯი კომისიის რეკომენდაციების შესასრულებლად, არ დასჯილა დამატებით არავინ, ვინც მონაწილეობდა მკვლელობაში, არ დასჯილა არავინ, ვინც ხელს აფარებდა მკვლელებს. ამ რეზოლუციის მხარდაჭერა იქნება ტესტი ქართული ოცნებისთვის".

სერგი კაპანაძის თქმით, რეზოლუციაში ნათქვამია, რომ რამდენიმე რეკომენდაცია უნდა შესრულდეს უახლოეს 10 დღეში:

"მათ შორის, მიხელ კალანდიას მიმართ სისხლისსამართლებრივი დევნის დაწყება, მირზა სუბელიანის ქმედებებზე გამოძიების დაწყება და იმ თანამდებობის პირების დასჯა, რომლებმაც მონაწილეობა მიიღეს ამ საქმის მიჩქმალვაში".

რეზოლუციის მიხედვით, საქართველოს პარლამენტმა უნდა მოსთხოვოს შინაგან საქმეთა სამინისტროს და მთავარ პროკურატურას, რომ კონკრეტული ნაბიჯები გადადგას რეკომენდაციების შესასრულებლად.

ევროპული საქართველოს დასკვნა

ევროპული საქართველოს 78-გვერდიან დასკვნაში 32 რეკომენდაციაზეა საუბარი, რომელიც ხუთ სხვადასხვა მიმართულებას ეხება.

საგამოძიებო კომისიის რეკომენდაციაა, დაიწყოს სისხლის სამართლებრივი დევნა მ.კ.-ს მიმართ, ამავე კოდექსის 109-ე მუხლის მე-2 ნაწილის "ბ" და "ე" ქვეპუნქტებით. ასევე საგამოძიებო კომისია შსს-სა და პროკურატურას მოუწოდებს დაიწყონ გამოძიება მირზა სუბელიანის ქმედებებზე.

საგამოძიებო კომისიის რეკომენდაციით, უნდა დაიწყოს გამოძიება მოწმეთა მიმართ გამოძიების დაწყება ცრუ ჩვენებისა და ცრუ ახსნა-განმარტების მიცემის, წეროვნიდან გ.ჯ.-ს წაყვანისას დანაშაულის დაფარვისა და შეუტყობინებლობის და გ.მ.-ს დაჭრის ფაქტებზე.

ასევე საგამოძიებო კომისიის რეკომენდაციაა, რეაგირება სისხლის სამართლის საქმის გამოძიებაზე პასუხისმგებელი მოხელეების/თანამდებობის პირების მიერ ჩადენილ დარღვევებზე. კომისია ასევე ითხოვს დაიწყოს გამოძიება ყოფილი მთავარი პროკურორის ირაკლი
შოთაძის ქმედებებზე.

მერვე რეკომენდაციაში, ევროპული საქართველო მინისტრების: თეა წულუკიანისა და გიორგი გახარიას პოლიტიკური პასუხისმგებლობის საკითხსაც აყენებს.

საგამოძიებო კომისია

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა.

საქართველოს კანონმდებლობით კომისია ვალდებულია, შექმნიდან ზუსტად სამი თვის თავზე წარმოადგინოს დასკვნა. ბოლო თვეების განმავლობაში კომისიის წინაშე წარგნენ, როგორც საგამოძიებო ორგანოების თანამდებობის პირები, ისე ხორავას ქუჩაზე მომხდარი მკვლელობის მოწმეები და აღმასრულებელი ხელისუფლების წარმომადგენლები. კომისიის ერთ-ერთ ბოლო საჯარო სხდომაზე გამოკითხეს შინაგან საქმეთა მინისტრი გიორგი გახარია და ყოფილი მთავარი პროკურორი, ირაკლი შოთაძე.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა, თანამდებობიდან გადადგა. მკვლელობის საქმეზე ახალი გარემოებების დადგენის მიზნით, შსს-მ ხელახალი გამოძიება დაიწყო, რომელსაც უშუალოდ გიორგი გახარია ხელმძღვანელობს. გამოძიების ფარგლებში მირზა სუბელიანი დანაშაულის შეუტყობინებლობისთვის, ხოლო მერაბ მორჩაძე მოწმეზე ზემოქმედების ბრალდებით დააკავეს.