ზღვაში დაკარგული სამხედროების ძებნა გონიოში ისევ გრძელდება. სამაშველო სამუშაოებში თურქეთის ხომალდი, რომელიც 26 ეკიპაჟის წევრისგან შედგება და სანავიგაციო რადარით არის აღჭურვილი, უკვე მეორე დღეა მონაწილეობს.

თურქული ხომალდი სამძებრო სამუშაოებს 200 მეტრ სიღრმესა და 350 მეტრის რადიოუსზე აწარმოებს.

ზღვაში ორი სამხედრო მოსამსახურის, იაგო შარაძისა და გიორგი ნანიტაშვილის პოვნა კვლავ ვერ ხერხდება. მათ ამ დრომდე მყვინთავთა რამდენიმე ჯგუფი ეძებს. გონიოში საზღვაო ზოლში იმყოფებიან სამხედრო პოლიციისა და გენერალური ინსპექციის წარმომადგენლები. საქმეში ჩართულია ავიაციაც.

საქართველოს თავდაცვის სამინისტროს განცხადებით, საწვრთნელი ვარჯიშის დროს, ზღვაში სიღრმითი ჩაყვინთვის შემდეგ, გიორგი ნანიტაშვილმა და იაგო შარაძემ ვერ შეძლეს ზღვის ზედაპირზე ამოსვლა და ამ დრომდე მათი ადგილსამყოფელი დაუდგენელია.