საქართველოს პრემიერმინისტრმა გიორგი კვირიკაშვილმა დმანისის მოსახლეობას ნაციონალური მოძრაობის ყოფილი წევრი კახა ოქრიაშვილი მაჟორიტარი დეპუტატობის კანდიდატად წარუდგინა:

"არჩევნებში გამარჯვების მეორე დღიდან დაიწყება შეუქცევადი აღმავლობა ჩვენს ქვეყანაში, რასაც ყველა ოჯახი საკუთარ თავზე იწვნევს,დღეიდან 4 წლის თავზე, ჩვენ გვექნება თვისობრივად განსხვავებული ქვეყანა" - თქვა პრემიერმა.

კვირიკაშვილის თქმით, კახა ოქრიაშვილს 10 წელზე მეტია იცნობს:

"ჯერ კიდევ საბანკო სექტორში მუშაობის დროს გავიცანი ის, როგორც ინიციატივიანი, პროფესიონალი ადამიანი. იგი ძალიან წარმატებულია თავის საქმეში. მისი კომპეტენცია ყოველთვის იყო ფართო. კახა პარლამენტში საქმიანობისას აქტიურობით გამოირჩეოდა".

კახა ოქრიაშვილი 2012 წლის არჩევნების შემდეგ პარლამენტში ნაციონალური მოძრაობის საარჩევნო ბლოკის სიით მოხვდა, თუმცა მოგვიანებით მან პარტია რამდენიმე თანაგუნდელთან ერთად დატოვა და ახალ ფრაქციას, უპარტიო დამოუკიდებელ მაჟორიტარებს, შეუერთდა.

უპარტიო დამოუკიდებელი მაჟორიტარები ქართულ ოცნებასთან 2014 წლის ნოემბერში გაერთიანდნენ.