ერთიან ნაციონალურ მოძრაობაში ამბობენ, რომ გაერთიანებული ოპოზიციის საპრეზიდენტო კანდიდატის, გრიგოლ ვაშაძის საარჩევნო პროგრამა Prezidenti.ge-ს კითხვებზე პასუხია. იმის მიუხედავად, რომ აღნიშნული კითხვა-პასუხი ვებგვერდზე არჩევნებამდე რამდენიმე კვირით ადრე გამოქვეყნდა, პარტიაში ამბობდნენ, რომ საბოლოო ვერსია 26 ოქტომბერს იქნებოდა მზად. დღეს, 31 ოქტომბერს პროგრამაზე საუბრისას Prezidenti.ge-ზე გვამისამართებენ.

ნაციონალურ მოძრაობაში გვარწმუნებენ, რომ პრეზიდენტის საარჩევნო პროგრამა ორჯერ გადმოგვიგზავნეს. On.ge ადასტურებს, რომ პარტიის პრესსამსახურიდან ორი დოკუმენტი მართლაც მიიღო: პირველი — საინფორმაციო ბუკლეტი, რომელსაც მოსახლეობას ურიგებენ და მეორე — Prezidenti.ge-ს გვერდიდან დაკოპირებული ტექსტი.

Prezidenti.ge-ზე ვკითხულობთ, რომ ვებგვერდი საარჩევნო კანდიდატებს თავისივე შერჩეულ კითხვებს უგზავნის და ცდილობს, ამომრჩეველს სხვადასხვა მნიშვნელოვან თემებზე პრეზიდენტის შეხედულებები გააცნოს. საკითხების ნაწილი პრეზიდენტის უფლებამოსილებაში არ შედის და მხოლოდ მოსაზრებას გამოხატავს. მაგალითად, Prezidenti.ge-ს კითხვებს შორისაა, საშემოსავლო გადასახადის შესახებ პრეზიდენტის ხედვა, ეკონომიკური ზრდის უზრუნველყოფისთვის გადასადგემლი ნაბიჯები, თვითმმართველობის მუშაობის ხარვეზები, განათლების პოლიტიკა და ა.შ. ანუ დოკუმენტები, რომელიც Prezidenti.ge-ს გვერდზეა გამოქვეყნებული, რიგი მიმართულებებით ცდება პრეზიდენტის უფლებებს.

პარტიის პრესსამსახურში გვარწმუნებენ, რომ გრიგოლ ვაშაძის საარჩევნო პროგრამა სწორედ ის ტექსტია, რაც Prezidenti.ge-ს გვერდზე გამოქვეყნდა და კითხვაზე, რა დოკუმენტი გაასაჯაროვეს 26 ოქტომბერს შემაჯამებელ შეხვედრაზე გვპასუხობენ, რომ " ეს ის ტექსტია, რაც Prezidenti.ge-ს საიტზე გამოქვეყნდა".

ბუკლეტი, რომელსაც ნაციონალური მოძრაობა მოქალაქეებს ურიგებს და ჩვენც გამოგვიგზავნა Prezidenti.ge-ზე გამოქვეყნებულ ინფორმაციასთან თანხვედრაში არაა და პრეზიდენტობის კანდიდატის დაპირებების ნაცვლად მეტწილად "ახალი ხელისუფლების დაპირებებს" ასახავს. პრეზიდენტის დაპირებები კი მხოლოდ ხუთი პუნქტით შემოიფარგლება.

თუკი ბუკლეტსა და საჯარო გამოსვლებში გრიგოლ ვაშაძე პენსიების 400 ლარამდე ზრდაზე საუბრობს, Prezidenti.ge-ზე გამოქვეყნებულ ტექსტში მხოლოდ შშმ პირების პენსიის რეალურ საჭიროებებთან გათანაბრებაზე საუბრობს. რაც შეეხება მასწავლებლისა და პოლიციელების ხელფასების ზრდას, ბუკლეტის მიხედვით, ეს ახალმა ხელისუფლებამ უნდა გააკეთოს. ხელისუფლების ცვლილება საპარლამენტო არჩევნებზეა დამოკიდებული, რომელიც 2 წლის შემდეგ 2020 წელს უწევს.

იმ შემთხვევაში თუ ნაციონალური მოძრაობა მოგვაწვდის რაიმე სხვა დოკუმენტს, რომელიც პრეზიდენტობის კანდიდატის საარჩევნო პროგრამის ასახავს, On.ge მზად არის გამოაქვეყნოს.

გრიგოლ ვაშაძე, რომლის საარჩევნო პროგრამასაც, On.ge უკვე ორი კვირაა ითხოვს, არჩევნების მეორე ტურში გასული კანდიდატია. ის მმართველი გუნდის მიერ მხარდაჭერილ კანდიდატს, სალომე ზურაბიშვილს მხოლოდ ერთი პროცენტით ჩამორჩება.