ცენტრალური საარჩევნო კომისიის წინასწარი შედეგებით, მმართველი პარტიის მიერ მხარდაჭერილმა კანდიდატმა, სალომე ზურაბიშვილმა პარიზის 40-ე საარჩევნო უბანზე წააგო და მეორე ადგილზე გავიდა.

გაერთიანებული ოპოზიციის კანდიდატმა, გრიგოლ ვაშაძემ 41 ხმა, ხოლო ზურაბიშვილმა 35 ხმა მიიღო. 22 ხმა მიიღო ევროპული საქართველოს კანდიდატმა, დავით ბაქრაძემ.

ფოტო: ცესკო

სალომე ზურაბიშვილი დამარცხდა საზღვარგარეთის საარჩევნო უბნებზე. გრიგოლ ვაშაძემ მიიღო ხმების 45,48 პროცენტი, ხოლო ზურაბიშვილმა 27,16 პროცენტი

ამ დროისთვის [08:20] ცესკოს ინფორმაციით, დათვლილია ხმების 99,57 პროცენტი, რის მიხედვითაც მეორე ტური გაიმართება. სალომე ზურაბიშვილს აქვს 38,66 პროცენტი აქვს, ხოლო გრიგოლ ვაშაძეს - 37,7 პროცენტი.

სამი ეგზიტპოლი და სამი შედეგი

საქართველოში საპრეზიდენტო არჩევნები დასრულდა და სამი ეგზიტპოლის მიხედვით, სამი სხვადასხვა შედეგი დაიდო.

მმართველი პარტიის ეგზიტპოლით, 52.3 %-ით მათმა მხარდაჭერილმა კანდიდატმა, სალომე ზურაბიშვილმა გაიმარჯვა. მათი თქმით, 28.1 % აქვს გაერთიანებული ოპოზიციის კანდიდატს, გრიგოლ ვაშაძეს და 9.2% ევროპული საქართველოს კანდიდატს, დავით ბაქრაძეს. ფსიქოპროექტმა 100 უბანზე 5104 ადამიანი გამოკითხა. ცდომილების ფარგლები 2.6%-ია.

ევროპული საქართველოს ეგზიტპოლით მეორე ტური იმართება. კერძოდ, 37% აქვს გრიგოლ ვაშაძეს და 34% სალომე ზურაბიშვილს. პარტიის კანდიდატს, დავით ბაქრაძეს 17% აქვს, შალვა ნათელაშვილს კი — 4. კომპანია BCG-მ 105 საარჩევნო უბანზე 6 000 ადამიანი გამოკითხა. მაქსიმალური ცდომილება 3%-ია.

რუსთავი 2-ის მიერ ჩატარებული ეგზიტპოლის შუალედური შედეგებითაც სალომე ზურაბიშვილს და გრიგოლ ვაშაძეს 40-40% ქონდათ, დავით ბაქრაძეს კი — 10%.