Independent-ის ინფორმაციით, ISIS რუსეთში მომხდარ ტერაქტზე პირველად იღებს პასუხისმგებლობას.

17 აგვისტოს ტერორისტების ორი მხარდამჭერი მოსკოვთან ახლოს, მაგისტრალზე, პოლიციის საგუშაგოს თავს დაესხა. ორივე მათგანი შეიარაღებული იყო ცეცხლსასროლი და ცივი იარაღებით.

როგორც რუსეთის საგამოძიებო კომიტეტი აცხადებს, ერთი მათგანი უშუალოდ თავდასხმის დროს მოკლეს, მეორე კი შეიარაღებული წინააღმდეგობის გაწევისას. მძიმედ დაშავდა ორი პოლიციელი.

მოგვიანებით გავრცელდა ვიდეო, რომელშიც ორივე თავდამსხმელი რუსულ და არაბულ ენებზე ე.წ. ისლამური სახელმწიფოს ერთ-ერთ ლიდერს აბუ ბაქრ ალ-ბაღდადს ერთგულებას უცხადებენ. ბოლოს კი რუსეთს თავდასხმით ემუქრებიან.

დადგენილია მათი ვინაობებიც. ჩეჩნური წარმოშობის უსმან მარდალოვი და შამილ ისმაილოვი ტერორისტული ჯგუფისაგან აღიარებულები იყვნენ, როგორც ე.წ. ისლამური სახელმწიფოს მებრძოლები.

რუსეთის სპეცსამსახურებმა ტერორისტებთან კავშირისა და პროპაგანდის გაწევის ბრალდებით ივლისში რამდენიმე ადამიანი დააკავეს. ჩეჩნური ჯგუფის ყველაზე ცნობილი წარმომადგენელი ომარ ალ-შიშანი იყო, იგივე ომარ ჩეჩენი, რომელიც ამერიკულმა სპეცრაზმმა თავდასხმისას მოკლა.

გასულ კვირას გავრცელდა ვიდეო, რომელშიც ნიღბიანი მებრძოლი ვლადიმერ პუტინს დაემუქრა, რომ ჩავიდოდა რუსეთში და მას საკუთარ სახლში მოკლავდა.

გასულ წელს, ე.წ. ისლამურმა სახელმწიფომ შარმ ელ-შეიხიდან სანკტ-პეტერბურგში მიმავალი თვითმფრინავი ჩამოაგდო. გარდაიცვალა 224 ადამიანი, მათ შორის 219 რუსი იყო.

მომხდარიდან ერთი თვის შემდეგ რუსეთმა პრეზიდენტ ბაშარ ალ-ასადის მებრძოლთა წინააღმდეგ სირიაში საჰაერო დაბომბვები დაიწყო.