საპარლამენტო ფრაქციის, ქართული ოცნების თავმჯდომარე, მამუკა მდინარაძე აცხადებს, რომ ბათუმში ნაციონალური მოძრაობის აქტივისტი, ჯელალ ქიქავა ურეკავდა ზონდერჯგუფებს და მოუწოდებდა მათ ფიზიკური ძალადობისა და პროვოკაციისკენ. მამუკა მდინარაძის თქმით, ისინი შესაბამისი შინაარსის ვიდეომასალას ფლობენ.

მამუკა მდინარაძის თქმით, მოგვიანებით, ჯელალ ქიქავამ ბათუმის მე-9 უბანზე ფიზიკური შეურაცხყოფა მიაყენა ქართული ოცნების მხარდამჭერ ქალბატონს.

"ჩვენი ინფორმაციით უკვე საქმის კურსში ჩააყენეს სამართალდამცავი ორგანოები და, ბუნებრივია, ამაზე იქნება გამოძიება და დაველოდებით შედეგებს", — განაცხადა მდინარაძემ.

მან სხვა დარღვევებზეც გაამახვილა ყურადღება, რომელშიც ნაციონალური მოძრაობა მონაწილეობს. მდინარაძის თქმით, ზუგდიდში ნაციონალური მოძრაობის წარმომადგენელი, მურთაზ ზოდელავა ტელეკამერების წინ ხევს სააგიტაციო მასალას და ამას ხსნის იმით, რომ "თითქოს უბნის შიგნით არის ეს მასალა, რეალურად არის უბნის გარეთ და არჩევნების დღესაც უბნის გარეთ აგიტაცია არ იკრძალება".

"როგორც ნახეთ, ევროპული საქართველოს წარმომადგენლები გამოესარჩლნენ ტელეკომპანია რუსთავი 2-ს იმ მოტივით, რომ არჩევნების დღეს საარჩევნო უბნის გარეთ აგიტაცია დაშვებულია, თუმცა ისინი შეგნებულად გვერდს უვლიან მთავარს - მოქმედი კანონმდებლობით, არჩევნების დღეს აკრძალულია მასმედიის საშუალებებით საარჩევნო თემატიკასთან დაკავშირებული რეკლამირება. კიდევ ერთხელ ვიმეორებ, რომ გუშინ რუსთავი 2, მიუხედავად საარჩევნო დღის დადგომისა, 12 საათის შემდეგ აგრძელებდა ანტირეკლამას, ცილისწამებას და შეურაცხყოფას ჩვენი მხარდაჭერილი კანდიდატის მიმართ", — განაცხადა მამუკა ბახტაძემ.

ფრაქციის თავმჯდომარემ ბრიფინგზე ასევე თქვა, რომ დადასტურებული ინფორმაციით, ნაციონალური მოძრაობის წევრები ღიად ავალებენ თავიანთ წარმომადგენლებს, რომ ნებისმიერ შემთხვევაში დაწერონ მაქსიმალურად ბევრი საჩივარი.

საქართველოში საპრეზიდენტო არჩევნები მიმდინარეობს. ეს ბოლო არჩევნებია, როცა პრეზიდენტს მოსახლეობა აირჩევს. საარჩევნო უბნები საქართველოში რვა საათზე გაიხსნა და პირველი ამომრჩეველიც დაფიქსირდა.

ცენტრალური საარჩევნო კომისიის ინფორმაციით, არჩევნები 3 703 უბანზე ტარდება. მათ შორის 55 საზღვარგარეთ, 11 კი საგამონაკლისო წესით შექმნილი უბანია. ცესკოში ამბობენ, რომ ამომრჩეველთა საერთო რაოდენობა 3 518 877 ადამიანს შეადგენს, რომელშიც შედის საზღვარგარეთ რეგისტრირებული 14 795 მოქალაქე. 12:00 საათის მონაცემებით ამომრჩევლის აქტივობა 15,95%-ია.

ამავე თემაზე:

ბოლო სიახლეები: საპრეზიდენტო არჩევნები 2018