ბიძინა ივანიშვილმა თავისი ოთხი ტელევიზიის ოთხ ჟურნალისტთან ინტერვიუ რუსთავი 2-ის კრიტიკით დაიწყო. ქართული ოცნების თავმჯდომარემ ტელეკომპანია კავკასია რუსთავი 2-ის სატელიტად მოიხსენია, რადგან ინტერვიუზე მისვლაზე უარი თქვა. თითქმის 18 წუთის განმავლობაში ბიძინა ივანიშვილი წინა ინტერვის არჩევდა და რუსთავი 2-ს აკრიტიკებდა.

ბიძინა ივანიშვილს მიაჩნია, რომ რუსთავი 2-ს "შეპყრობილი ჰყავს საზოგადოება" და სიცრუეს ავრცელებს. მან ისევ ისაუბრა მედიასტანდარტებზე, რომელიც სურს, რომ ტელევიზიებმა დაიცვან. ივანიშვილი ფიქრობს, რომ ეკა კვესიტაძეს ინტერვიუს ჩაგდება სურდა.

"კვესიტაძე, ძალიან ცდილობდა, რომ [დიანა] ტრაპაიძეც დახმარებოდა, მაგრამ მე მოვახერხე დამეშორებინა, თავშივე ვიცოდი მაგათი კომუნიკაცია. ძალიან კარგია, არ თქვან, რომ რაღაცაში ვამხილე, ჰქონდეთ კოორდინაცია".

23 ოქტომბრის ინტერვიუს დროს ბიძინა ივანიშვილმა არაერთ საკითხზე ისაუბრა, მათ შორის, რუსთავი 2-ის მიმართ საკუთარ დამოკიდებულებაზე. ივანიშვილმა არაერთხელ განაცხადა, რომ ტელეკომპანია ტყუილებს ავრცელებს.

"დღეს რომ გამოვრთოთ რუსთავი 2, ქვეყანაში აღმავლობის მეტს ვერაფერს ნახავთ. 99 პროცენტი არის სიცრუე", — აღნიშნა ივანიშვილმა.

მისივე თქმით, პარტიაში ჩამოყალიბებულ პიარჯგუფთან ერთად შეეცდებიან, რომ რუსთავი 2-ში "განსხვავებული აზრი შევიდეს". ივანიშვილმა, ასევე, განაცხადა, რომ საქართველოს ამჟამინდელი მდგომარეობის ყველას შურს.