თბილისის მერია აცხადებს, რომ ყაზბეგის #22-ში მოჭრილ ხეებზე დასკვნა თავის დროზე შპს ფორესთ კომპანიმ მოამზადა.

მერიის თქმით, დასკვნის თანახმად, 68 ხიდან 45 ხე ხანდაზმული, დაავადებული და ხმობადია:

"სწორედ აღნიშნული დასკვნის მიხედვით მერიის ეკოლოგიის და გამწვანების საქალაქო სამსახურმა გასცა ნებართვა 45 ხის მოჭრის თაობაზე".

მერიის განცხადებით, საქმის მასალებს ისინი საქართველოს მთავარ პროკურატურას გადასცემენ.

მერიის განცხადებით, ზედამხედველობის საქალაქო სამსახურმა ყაზბეგის #22-ში ხეების ჭრის პროცესი შეაჩერა:

"მოჭრილი ხეების ვიზუალური დათვალიერებისა და მაღალი საზოგადოებრივი ინტერესის გათვალისწინებით, ეჭვქვეშ დადგა შპს ფორესთ კომპანის მიერ გაცემული დასკვნის ობიექტურობა".

მერიის თქმით, ეკოლოგიის და გამწვანების საქალაქო სამსახურმა ხეების მოჭრის ნებართვა შპს ფორესთ კომპანის დასკვნის საფუძველზე გასცა:

"ეკოლოგიის და გამწვანების საქალაქო სამსახურის მიერ შპს ორბი ჯგუფი თბილისისთვის გაგზავნილ წერილში აღნიშნულია, რომ ტერიტორიაზე უნდა შენარჩუნდეს 18 ძირი საღი კვიპაროზი, 5 ძირი ხე კი აგროტექნიკური ღონისძიებების სრული დაცვით გადაირგოს მიმდებარედ, ისე, რომ არ დაირღვეს მათი სასიცოცხლო ფუნქცია".

მერია აცხადებს, რომ აღნიშნულ ტერიტორიაზე დაგეგმილია 150 მილიონიანი უცხოური ინვესტიცია, რომელიც სასტუმრო კომპლექსის მშენებლობას გულისხმობს.

"შეიქმნება 2 000 მუდმივი სამუშაო ადგილის და ამავე ტერიტორიაზე ახალი რეკრეაციული ზონა განვითარდება".

გუშინ ორბი ჯგუფმა ყაზბეგის გამზირზე ასწლოვანი ნაძვები მოჭრა. მოჭრილია 13 საღი ხე.

ნატა ფერაძემ თბილისის მერიასთან უვადო შიმშილობა დაიწყო. ის მოითხოვს, ეკოლოგიისა და გამწვანების სამსახურის თანამშრომლების გათავისუფლებასა და კვალიფიციური კადრების აყვანას, ასევე ქალაქში მიმდინარე ეკოპროცესების მკაცრ იურიდიულ გამოძიებას.

დღეს ყაზბეგის გამზირზე ხეების მოჭრის საკითხზე პროკურატურაში საჩივარი შევიდა.