Facebook-ის ახალი ფუნქცია Myspace-ის ეპოქაში დაგაბრუნებთ: სულ მალე შეგეძლებათ, საკუთარ პროფილს მუსიკის სექცია დაამატოთ და ნაცვლად შემსრულებლების გვერდების ჩვენებისა, რეალურად მოასმენინოთ მეგობრებს თქვენი საყვარელი სიმღერები. სიახლეს წლის ბოლომდე რამდენიმე ქვეყანაში ვიხილავთ.

საწყის ეტაპზე მხოლოდ ნაწყვეტების მოსმენა იქნება შესაძლებელი, თუმცა Facebook აქტიურად მუშაობს Spotify-სა და Apple Music-თან, რათა საკუთარი მომხმარებლისთვის სიმღერების სრული ვერსიებიც ხელმისაწვდომი გახადოს.

ფოტო: Facebook

გარდა ამისა, კიდევ ორი მუსიკალური ფუნქციის დანერგვა იგეგმება:

Lip Sync Live, რაც მარტივად რომ ვთქვათ, სიმღერისთვის ტუჩის მოძრაობის აყოლებას გულისხმობს

ფოტო: Facebook

ამ ფუნქციით შეძლებთ, თქვენ მიერ შერჩეულ სიმღერაზე რამდენიმეწამიანი ვიდეო გადაიღოთ, სადაც ცეკვავთ ან სიმღერის ტექსტს ტუჩების მოძრაობას აყოლებთ. საქმის გასაადვილებლად, ეკრანზე სიტყვებიც გამოჩნდება. უკვე ცნობილია რამდენიმე ჰიტი, რომელთა გამოყენების უფლებაც ფეისბუქმა ხმისჩამწერ სტუდიებთან კონტრაქტის შედეგად მოიპოვა: დუა ლიპას New Rules, Khalid-ის Better და Maroon 5-ის Girls Like You. სწორედ ამ ფუნქციამ მოუტანა პოპულარობა 2014 წელს სოციალურ ქსელს Musical.ly-ს. ამ პლატფორმაზე მომხმარებლები (ძირითადად, თინეიჯერები) ცნობილ სიმღერებზე შექმნილ მოკლე ვიდეორგოლებს ტვირთავენ.

ფეისბუქის მუსიკა სთორისა და ნიუსფიდისთვის

ფოტო: Facebook

მალე თქვენს სთორის საუნდტრეკი ექნება. ფუნქცია უკვე ხელმისაწვდომია აშშ-ში და ევროპის რამდენიმე ქვეყანაში. თქვენ შეძლებთ სიმღერების კატალოგიდან აირჩიოთ ტრეკი და მისი კონკრეტული მონაკვეთი, რომელსაც სთორის დაადებთ, მერე კი შექმნილი კლიპების ნიუსფიდშიც დააშეაროთ.

ფეისბუქს უკვე დიდი ხანია საყვედურობენ, რომ ის მელომანებზე მორგებული არაა. ალბათ, თავადაც შეამჩნევდით, რომ Youtube-დან თქვენს კედელზე სიმღერის გაზიარება თითქმის უსარგებლოა. ახალი ცვლილებებით კი სულ მალე ფეისბუქი ბევრად მუსიკალურ ადგილად იქცევა.