საერთაშორისო ურთიერთობის სპეციალისტის, თორნიკე შარაშენიძის თქმით, ქართული ოცნების თავმჯდომარემ და ყოფილმა პრემიერმა, ბიძინა ივანიშვილმა რეალობასთან შეხება დაკარგა. შარაშენიძემ ივანიშვილის ინტერვიუ რუსთავი 2-თან შეაფასა.

"ხანდახან მე მართლა მგონია, რომ ბიძინა ივანიშვილი დარწმუნებულია, რომ ქვეყანა ყვავის და რუსთავი 2 ყველაფერს ხატავს შავ ფერებში. ეს, ალბათ, იმითაც არის გამოწვეული, რომ მას გარშემო არ დარჩა სიმართლის მთქმელი, არ დარჩა ვინც კრიტიკას გაუბედავს, ვინც განსხვავებულ აზრს შებედავს. ეს კაცი ცხოვრობს სხვა რეალობაში", — აღნიშნა შარაშენიძემ.

23 ოქტომბრის ინტერვიუს დროს ბიძინა ივანიშვილმა არაერთ საკითხზე ისაუბრა, მათ შორის, რუსთავი 2-ის მიმართ საკუთარ დამოკიდებულებაზე. ივანიშვილმა არაერთხელ განაცხადა, რომ ტელეკომპანია ტყუილებს ავრცელებს.

"დღეს რომ გამოვრთოთ რუსთავი 2, ქვეყანაში აღმავლობის მეტს ვერაფერს ნახავთ. 99 პროცენტი არის სიცრუე", — აღნიშნა ივანიშვილმა.

მისივე თქმით, პარტიაში ჩამოყალიბებულ პიარჯგუფთან ერთად შეეცდებიან, რომ რუსთავი 2-ში "განსხვავებული აზრი შევიდეს". ივანიშვილმა, ასევე, განაცხადა, რომ საქართველოს ამჟამინდელი მდგომარეობის ყველას შურს.