ვაშინგტონში მდებარე ბიბლიის მუზეუმის განცხადებით, შენობაში დაცული მკვდარი ზღვის გრაგნილების ფრაგმენტები ყალბია და მათ გამოფენიდან ამოიღებენ.

მკვდარი ზღვის გრაგნილის ფრაგმენტები 1947 წელს აღმოაჩინეს და წინა ინფორმაციით, ისინი 2 000 წლის წინ იყო შექმნილი. თუმცა გერმანელი ექსპერტების ანალიზმა აჩვენა, რომ 16 ფრაგმენტიდან შემოწმებული ხუთი ყალბი იყო და უძველეს წარმომავლობასთან კავშირი არ ჰქონდა.

მკვდარი ზღვის გრაგნილები ებრაული ბიბლიის უძველესი ხელნაწერებად მოიაზრებოდა.

როგორც ცნობილია, პირველი გრაგნილი მკვდარი ზღვის სანაპიროზე მდებარე გამოქვაბულში ახალგაზრდა ბედუინმა მწყემსმა იპოვა, როდესაც დაკარგულ ცხვარს ეძებდა.

ბიბლიის მუზეუმი ევანგელისტმა და მილიარდელმა სტივ გრინმა 2017 წელს გახსნა. მისი ღირებულება 500 მილიონი დოლარია. ექსპერტები იმ დროიდან საუბრობდნენ რელიგიური ფრაგმენტების არანამდვილობაზე. მუზეუმში იმედოვნებდნენ, რომ შემოწმება მათ ნამდვილობას დაამტკიცებდა.

"იმედი მქონდა, რომ შემოწმება განსხვავებულ პასუხს აჩვენებდა, თუმცა მნიშვნელოვანია, რომ ბიბლიური არტეფაქტების სინამდვილე შემოწმდეს", - ამბობს მუზეუმის წარმომადგენელი ჯეფრი კლოჰა.