არქეოლოგებმა შავი ზღვის ფსკერზე, ბულგარეთის სანაპიროსთან ახლოს, 2400 წლის წინ ჩაძირული გემი აღმოაჩინეს, რომელიც ხელუხლებელ მდგომარეობაშია შემონახული.

23-მეტრიანი ხომალდი, რომელსაც წყლის ზედაპირამდე 1.6 კმ აშორებს, სავარაუდოდ, ძველ ბერძნებს ეკუთვნოდათ. მეცნიერების აზრით, გემი დაზიანებას ასეთ სიღრმეში ჟანგბადის არარსებობის გამო გადაურჩა.

"ვერასდროს დავიჯერებდი, რომ კლასიკური სამყაროდან შემორჩენილ გემს ვნახავდი", - ამბობს პროფესორი ჯონ ადამსი, შავი ზღვის წყალქვეშა არქეოლოგიური პროექტის მთავარი მკვლევარი, - "ეს გემთმშენებლობისა და მეზღვაურობის შესახებ ჩვენს წარმოდგენას შეცვლის".

აღმოჩენილი "ჩონჩხი" ძალიან ჰგავს ძველ ბერძნულ ლარნაკებზე გამოსახულ ხომალდებს.

ე.წ. "სირინოზების ლარნაკი" ბრიტანეთის მუზუემში: შავი ზღვის ფსკერზე აღმოჩენილი გემი ძალიან ჰგავს ხომალდს, რომლითაც მითიური ოდისევსი მოგზაურობდა

ფოტო: Werner Forman / Getty Images

მკვლევრების გუნდის განცხადებით, გემისთვის ადგილის შეცვლა არ იგეგმება. საუსჰემპტონის უნივერსიტეტის მეცნიერებმა ხომალდის მცირე ნაწილი აღმოჩენის დასათარიღებლად გამოიყენეს და დაადასტურეს, რომ ეს კაცობრიობისთვის ცნობილი უძველესი გემია.

ამ აღმოჩენასთან დაკავშირებით რამდენიმე დღეში ლონდონში კონფერენცია გაიმართება.

შავი ზღვის ფსკერზე სამწლიანი პროექტის ფარგლებში წყალქვეშა არქეოლოგებმა სულ 60-ზე მეტი ჩაძირული გემი იპოვეს.