ახალქალაქის მერის მოადგილის, არმენ მარანგოზიანის ფეისბუქის გვერდზე, საპრეზიდენტო კანდიდატის, სალომე ზურაბიშვილის მხარდამჭერი პოსტის გაზიარება ცესკომ სამართალდარღვევად არ მიიჩნია. არმენ მარანგოზიანმა საოლქო კომისიაში განმარტა, რომ ზურაბიშვილის მხარდამჭერი პოსტი არა თავად, არამედ 1-2 ოქტომბერს, პირადი მობილურით, ცოლმა გააზიარა. მარანგოზიანი ამბობს, რომ ინფორმაცია თავისი მობილური ტელეფონით გაზიარდა და არა მუნიციპალიტეტის ბალანსზე არსებული ტექნიკით. შესაძლო კანონდარღვევაზე რეაგირებისთვის ცესკოს საჩივრით ორგანიზაცია სამართლიანმა არჩევნებმა მიმართა.

"ჩემი სოციალური ქსელის ვებგვერდით ვსარგებლობ არა მარტო მე, არამედ ჩემი მეუღლეც, მადონა ოგანესიანი", — ნათქვამია მერის მოადგილის ახსნა-განმარტებაში.

მიუხედავად იმისა, რომ ცესკომ სამართალდარღვევის ოქმი ამ საქმეზე არ შეადგინა, მარანგოზიანის ფეისბუქგვერდზე ზურაბიშვილის სააგიტაციო ინფორმაცია დღეს, 22 ოქტომბერს აღარ იძებნება. საჩივრის თანახმად, არმენ მარანგოზიანის ფეისბუქის პირად გვერდზე, პრეზიდენტობის კანდიდატის, სალომე ზურაბიშვილის წინასაარჩევნი შეხვედრასთან დაკავშირებული ინფორმაცია 1-2 ოქტომბერს გააზიარეს.

მსგავსი შემთხვევა იყო #58 წყალტუბოს საუბნო საარჩევნო კომისიის თავმჯდომარის საქმეზე. ქრისტინა ქუთათელაძემ ფეისბუქის თავის გვერდზე პრეზიდენტობის კანდიდატის, სალომე ზურაბიშვილის მხარდამჭერი ინფორმაცია გაავრცელა.

თავმჯდომარის განმარტებით, აღნიშნულ პერიოდში (5-10 ოქტომბერი), როცა მას და მის შვილს ჯანმრთელობის პრობლემები ჰქონდათ, მისი ფეისბუქგვერდით მისივე ქმარი სარგებლობდა. ქუთათელაძის მტკიცებით, სააგიტაციო მასალა ქმარმა გააზიარა.