საქართველოს შინაგან საქმეთა მინისტრის, გიორგი გახარიას განცხადებით, ციხის მორიგ აუდიოჩანაწერებთან დაკავშირებით, სადაც მოწმის მოსყიდვაზეა საუბარი, გამოძიება იმ შემთხვევაში დაიწყება, თუ თემის მოკვლევის შემდეგ მირზა სუბელიანის საუბრიდან მცირედი მაინც დადასტურდება. ამის შესახებ გიორგი გახარიამ რუსთავი 2-თან საუბრისას განაცხადა.

გიორგი გახარიას თქმით, გამოძიების დაწყებისთანავე მოწმეზე ზეწოლისა და ზემოქმედების ბრალდებით უწყებამ 5-ზე მეტი პირი დააკავა. რაც შეეხება ჩანაწერების შინაარსს, ფაქტი იქნება გამოძიებული და თუ ის დადასტურდა, მონაწილე პირები დაისჯებიან.

შს მინისტრი ჩანაწერის იმ ნაწილსაც ეხმაურება, რომელშიც მირზა სუბელიანი ქალაქის ყოფილ პროკურორზე საუბრობს. გიორგი გახარიას განცხადებით გამოძიებამ უნდა დაადგინოს ჰქონდა თუ არა ადგილი მიხეილ შაყულაშვილის მხრიდან რაიმე სახის სამართლებრივ გადაცდომას.

"ზუსტად შაყულაშვილის დარღვევების გამოსავლენად იყო შექმნილი საპარლამენტო კომისია, რომელმაც მუშაობა დაასრულა და თავისი დასკვნა დადო. გეუბნებით, რომ ერთ მხარეს გვაქვს საპარლამენტო კომისიის დასკვნა და მეორე მხარეს გვაქვს პატიმარ მირზა სუბელიანის საუბარი, ფარული ჩანაწერი. საუბრის ფარული ჩანაწერი მის სამ სტუმართან. შესაბამისად, ჩვენი ამოცანაა ის პასუხები სამართლებრივი, რაც ეკუთვნის ამ ფარულ ჩანაწერს გავცეთ და მხოლოდ ამის შემდეგ, ვიმსჯელოთ ამაზე რა ფუნქცია, როლი ან რაიმე დარღვევა განახორციელა ბატონმა შაყულაშვილმა", — განაცხადა გიორგი გახარიამ.

ტელეკომპანია რუსთავი 2-მა, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის მონაწილეობით კიდევ ერთ აუდიოჩანაწერი გაავრცელა. ჩანაწერის ერთ-ერთ ფრაგმენტში, სავარაუდოდ, დავით ცუხიშვილი ამბობს, რომ ხორავას ქუჩის საქმეზე ერთ-ერთი მოწმე ათი ათასით მოისყიდა