თბილისის პოლიციის მთავარი სამმართველოდან დედაენის ბაღში გირჩის დაკავებული აქტივისტებისა და ლიდერების ნაწილი გაათავისუფლეს. მათ შორის არიან ვახტანგ მეგრელიშვილი, იაგო ხვიჩია და ნიკა ობოლაძე. ზურა ჯაფარიძეს ჯერ კიდევ სამმართველოსთან ელოდებიან.

როგორ ხვიჩიამ ჟურნალისტებს უთხრა, მას ზურა ჯაფარიძე არ უნახავს და პოლიციასთან ბევრ თემაზე ისაუბრა.

"ეს დღე ისტორიაში ჩაიწერება, მაგრამ ასეთია საბჭოთა კავშირიდან გამოსვლა", — აღნიშნა ხვიჩიამ.

პრეზიდენტობის კანდიდატი ზურა ჯაფარიძე დღეს, 20 ოქტომბერს მას შემდეგ დააკავეს, რაც მან სამი ცალი ჯოინთი დედაენის ბაღში მარიხუანის ლეგალიზაციის ფესტივალისთვის შეკრებილებს დაურიგა. მის დაკავებას დაპირისპირება მოჰყვა, რა დროსაც პოლიციამ რამდენიმე მოქალაქე დააკავა.

მანამდე, ფესტივალის დაწყებამდე პოლიციამ წაიყვანა ნიკა ობოლაძე, ვახტანგ მეგრელიშვილი და იაგო ხვიჩია, ასევე, ორი მხარდამჭერი. როგორც შსს განმარტავს, არც ერთი მათგანი დაკავებული არ არის და ისინი გამოძიების ფარგლებში გადაიყვანეს განყოფილებაში.

გარდა ამისა, უწყება განმარტავს, რომ ჯაფარიძეს სამართალდამცავებმა განყოფილებაში გაყოლა შესთავაზეს, რაზეც ის დათანხმდა.