პარლამენტში ქართულ ოცნების დეპუტატის, ანრი ოხანაშვილის თქმით, თუ ჟურნალისტმა იცის, რომ ჩანაწერი უკანონოდ არის მოპოვებული სასურველია, რომ პროკურატურას მიმართოს და ჩანაწერი მას გადასცეს. ამის შესახებ დეპუტატმა გადაცემა 7VS1-ში განაცხადა.

"სამართლებრივ სახელმწიფოს გადმოსახედიდან და იმ პოზიციის გადმოსახედიდან, თუ ჟურნალისტმა იცის, რომ ეს არის უკანონოდ და დანაშაულებრივი გზით არის მოპოვებული, რა თქმა უნდა, სასურველია და ვისურვებდი, რომ მიმართოს პროკურატურას და გადასცეს", — აღნიშნა დეპუტატმა.

მან, ასევე, განმარტა, რომ საბოლოოდ ეს ჟურნალისტური ეთიკისა და პროფესიის საკითხია.

აუდიოჩანაწერების გავრცელების კანონიერებაზე საუბრობს ქართული ოცნების კიდევ ერთი დეპუტატი, ეკა ბესელია. მისი თქმით "მირზა სუბელიანის ჩანაწერების" გავრცელებით მედიამ კანონი დაარღვია, რომელსაც სისხლის სამართლის კოდექსის 158 მუხლი არეგულირებს.

ეკა ბესელიას თქმით, ამ მუხლით დასჯადია არა მხოლოდ ინფორმაციის უკანონოდ მოპოვება, არამედ მისი გავრცელებაც.

სისხლის სამართლის კოდექსის 158-ე მუხლი კერძო კომუნიკაციებს არეგულირებს.

ამ კანონის პირველი მუხლის მიხედვით, კერძო საუბრის უნებართვო ჩაწერა ან მიყურადება, აგრეთვე კომპიუტერულ სისტემაში ან სისტემიდან კერძო კომუნიკაციისას გადაცემული კომპიუტერული მონაცემის ან ამგვარი მონაცემის მატარებელი ელექტრომაგნიტური ტალღების უნებართვო მოპოვება ტექნიკური საშუალების გამოყენებით ან კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის ან კომპიუტერული მონაცემის უკანონოდ შენახვა ისჯება ჯარიმით ან თავისუფლების აღკვეთით ვადით ორიდან ოთხ წლამდე.

კერძო კომუნიკაციის ჩანაწერის, ტექნიკური საშუალებით მოპოვებული ინფორმაციის ან კომპიუტერული მონაცემის უკანონოდ გამოყენება, გავრცელება ან ხელმისაწვდომობის სხვაგვარი უზრუნველყოფა, ისჯება ჯარიმით ან თავისუფლების აღკვეთით ვადით ორიდან ხუთ წლამდე.