ბრაზილიაში, კომპანია გლობოს მიერ გადაღებული სერიალი, Assédio (შევიწროება), სამხრეთ ამერიკაში ბოლო დროის ერთ-ერთი ყველაზე რეიტინგული და წარმატებული მინისერიალი გახდა.

სერიალის სიუჟეტი წარმატებული ექიმის შესახებ მოგვითხრობს, რომელიც პაციენტ ქალებს სექსუალურად ავიწროებს. გამომდინარე იქიდან, რომ ექიმს დიდი ავტორიტეტი აქვს, ქალები ხმის ამოღებას ვერ ბედავენ. თუმცა, როდესაც ერთი მათგანი გადაწყვეტს მოყვეს, რა ხდება კაბინეტში, დახურულ კარს მიღმა, სხვებიც მის გვერდით დადგებიან.

სერიალის შემქმნელი, მარია კამარგო ამბობს, რომ ეს ჰოლივუდში დაწყებული #MeToo და Time's Up კამპანიების ბრაზილიური გაგრძელებაა.

"ბრაზილიაში ქალების უმრავლესობა სექსუალური შევიწროების მსხვერპლია, ეს ხდება ყველგან - ქუჩაში, სახლში, სამსახურში, კაფესა თუ ღამის კლუბებში. დროა, ქალებმა ხმის ამოღება დავიწყოთ და ერთხელ და სამუდამოდ დავუსვათ წერტილი იმ საშინელებას, რაც წლებია ხდება", - ამბობს კამარგო.

სერიალში მთავარ როლებს პოპულარული ბრაზილიელი მსახიობები - ადრიანა ესტევესი, ვერა ფიშერი, პაოლა ოლივეირა და ანტონიო კალონი ასრულებენ.

სერიალს გლობოს ეთერში საშუალოდ 33 მილიონი ადამიანი უყურებს.