რუსთავი 2-ის გენერალური დირექტორი ნიკა გვარამია ტელეკომპანიის ეთერით ახალი აუდიოჩანაწერების გასვლას აანონსებს. მისივე თქმით, პროკურატურისგან განსხვავებით მათ სამზე მეტი საუბრის აუდიოჩანაწერი აქვთ და ყველა მათგანი გამოქვეყნდება.

"გაგრძელება იქნება. ჩვენ ნამდვილად მოგასმენინებთ იმ ჩანაწერებთ კიდევ უფრო ხანგრძილვს, ვიდრე ეს აქამდე იყო, სადაც ადამიანები საუბრობენ ნატურალურად და არა დადგმულად", — განაცხადა გვარამია პრესკონფერენციაზე.

გვარამიამ, ასევე, მთავარი პროკურატურის მიერ დღეს, 16 ოქტომბერს გამოქვეყნებულ აუდიჩანაწერი შეაფასა და მათ დადგმული უწოდა

"დღეს გამოქვეყნებული ჩანაწერი იმას ადასტურებს, რომ ჩანაწერი იქნა დადგმული და საქართველოს პროკურატურა კიდევ ერთხელ გაეხვია უმძიმეს სკანდალში და დანაშაულში მთელ სახელმწიფო სისტემასთან ერთად".

გვარამია, ასევე, აუდიჩანაწერის ტექნიკურ ნიუანსებზე საუბრობს. მისი თქმით, პროკურატურის ჩანაწერში მონაწილე პირები, მირზა სუბელიანი და ქართული ოცნების დეპუტატი ვიქტორ ჯაფარიძე ტექსტს "პირდაპირ ეთერში კითხულობენ".

"მირზა სუბელიანის ჩანაწერები"

14 ოქტომბერს რუსთავი 2-ის მიერ გავრცელებულ აუდიოჩანაწერში, რომლის ავთენტურობა ჯერ არაა დადგენილი, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

პროკურატურაში ამბობენ, რომ გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია.

16 ოქტომბერს პროკურატურამ "მირზა სუბელიანის ფარული ჩანაწერების" საქმეზე გამოძიების ფარგლებში მოპოვებული ახალი აუდიოჩანაწერი გაავრცელა. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

გამოძიების ცნობით, იმ პირის მეხსიერების ბარათიდან, რომელსაც პროკურატურის ვერსიით ციხეში ჩანაწერების გაკეთება აიძულეს, სულ სამი ჩანაწერია ამოღებული, მათგან ერთი, 11 ოქტომბრით დათარიღებული აუდიოფაილი რუსთავი 2-მა უკვე გაასაჯაროვა.

საგამოძიებო უწყების ცნობით, ვინაიდან რუსთავი 2-მა ერთი ჩანაწერი უკვე გაასაჯაროვა, ისინი მეორე ჩანაწერს გაასაჯაროებენ, რომელშიც ქართული ოცნების დეპუტატი, ვიქტორ ჯაფარიძე და მირზა სუბელიანი საუბრობენ.