ამერიკის შტატ ჯორჯიაში ვიღაცამ გადაწყვიტა, რომ ნათანიელ გრინის ძეგლს გახალისება სჭირდებოდა და 15-მეტრიან ქანდაკებას ბრიალა თვალები დაამაგრა.

სამწუხაროდ, ქალაქ სავანას მთავრობამ ამბავი არც ისე სახუმაროდ ჩათვალა და საზოგადოებას დამნაშავის პოვნაში დახმარებისკენ მოუწოდა:

"ეს ვინ გააკეთა? ვიღაცამ ნათანიელ გრინის ძეგლს ბრიალა თვალები დააკრა. შეიძლება სასაცილოდ გამოიყურება, მაგრამ ისტორიული ძეგლისა და საჯარო საკუთრების დაზიანება სასაცილო სულაც არაა და უფრო მეტიც, ეს კრიმინალია. თუ იცით, ეს ვინ ჩაიდინა, მიმართეთ პოლიციას", - წერია ქალაქის მერიის მიერ გამოქვეყნებულ ფეისბუქ პოსტში.

ფოტო: City of Savannah Government / Facebook

ფოტო: City of Savannah Government / Facebook

პოსტი მალე გავირუსდა და მას ამ დროისთვის 13 ათასზე მეტი ჰაჰა რეაქცია და 32 ათასზე მეტი გაზიარება აქვს.

სავანას პოლიციის დეპარტამენტის პრესსპიკერმა, კეტურა გრინმა განაცხადა, რომ ძეგლს თვალები უკვე მოაშორეს და ის დაზიანებული არაა, თუმცა გამოძიება დაწყებულია და სამართალდამცველები მიმდებარე ტერიტორიაზე არსებული კამერების ჩანაწერების გაშიფვრას აპირებენ.

ჯორჯიის ახალი ენციკლოპედიის მიხედვით, ნათანიელ გრინი რევოლუციური ომის დროს ერთ-ერთი ყველაზე პატივსაცემი გენერალი და ნიჭიერი სამხედრო სტრატეგი იყო.