ზღვაში ორი სამხედრო მოსამსახურის იაგო შარაძისა და გიორგი ნანიტაშვილის პოვნა კვლავ ვერ ხერხდება. მათ ამ დრომდე მყვინთავთა რამდენიმე ჯგუფი ეძებს. გონიოში საზღვაო ზოლში იმყოფებიან სამხედრო პოლიციისა და გენერალური ინსპექციის წარმომადგენლები. საქმეში ჩართულია ავიაციაც.

ერთ-ერთი დაკარგულის იაგო შარაძის მამა აცხადებს, რომ წვრთნების დროს უსაფრთხოების ნორმები დაცული არ იყო:

"ხომ შეიძლებოდა წვრთნების დროს ერთი პატარა ნავი ჰყოლოდათ, მაშველები ჰყოლოდათ. ახალი დაწყებული ჰქონდა ჩემ შვილს, ძალიან ძლიერი მოცურავე იყო, რაღაცამ უმტყუნა".

ძებნაში მონაწილეობას იღებენ აშშ-ის სპეცდანიშნულების ძალებიც. საქართველოს თხოვნის შემდეგ აშშ-ის მთავრობამ საქმეში შტატების ევროპული სარდლობის ნაწილი ჩართო.

ქართველი და ამერიკელი სამხედროები დაკარგულებს ერთობლივი ძალებით ეძებენ.

საქართველოს თავდაცვის სამინისტროს განცხადებით, საწვრთნელი ვარჯიშის დროს, ზღვაში სიღრმითი ჩაყვინთვის შემდეგ, გიორგი ნანიტაშვილმა და იაგო შარაძემ ვერ შეძლეს ზღვის ზედაპირზე ამოსვლა და ამ დრომდე მათი ადგილსამყოფელი დაუდგენელია.