რუსთავი 2-ის ეთერში საქართველოს ექსპრემიერის, ვანო მერაბიშვილის ინტერვიუს გასვლის შემდეგ სპეციალური პენიტენტიცური სამსახური მისი გამოკვლევების შედეგებს ასაჯაროებს.

6 მძიმე მეტალზე ზურაბიშვილის სისხლის ანალიზის შედეგები მას შემდეგ გასაჯაროვდა, რაც მერაბიშვილმა ინტერვიუში განაცხადა, რომ მას "მარტივი დარიშხანით" არ მოწამლავდნენ და თუ მოწამლავდნენ ამის აღმოჩენა რთული იქნებოდა. უწყების განცხადებით, უცხოეთიდან მიღებული გამოკვლევების შედეგები დღეს მაღალი საზოგადოებრივი ინტერესიდან გამომდინარე გაასაჯაროეს.

უწყებაში ასევე ამბობენ, რომ ეს ანალიზები მერაბიშვილს მაშინ ჩაუტარდა, როცა 2-4 ოქტომბერს კლინიკაში იყო გადაყვანილი. მათივე თქმით, შედეგები უცხოეთში გადაიგზავნა და კონსილიუმმა დაადგინა, რომ ინტოქსიკაციას ადგილი არ ჰქონია.

"ყოველგვარი ეჭვის გამორიცხვის მიზნით, მიღებული იქნა გადაწყვეტილება, რომ მსჯავრდებულს მძიმე მეტალების შემცველობაზე სისხლის ლაბორატორიული გამოკვლევა ჩატარებოდა. ანალიზი ჩატარდა 6 მძიმე მეტალზე: რკინა, სპილენძი, ტყვია, კადმიუმი, მანგანუმი და თუთია, ასევე კალციუმსა და მაგნიუმზე. მასალა გამოსაკვლევად გადაიგზავნა გერმანიაში "ლაბორატორია მრჩეველი - ლიმბახის დიაგნოსტიკის ევროპულ ჯგუფი"-ს მიერ. მიღებული პასუხის შედეგად ირკვევა, რომ ყველა ზემოთხსენებული მეტალის და მაკროელემენტის კონცენტრაცია სისხლში არის ნორმის ფარგლებში", — წერია პენიტენციური სამსახურის გავრცელებულ განცხადებაში.

უწყების მტკიცებით, ექიმებმა მიიჩნიეს, რომ მერაბიშვილი დამატებით გამოკვლევებს არ საჭიროებს. ყოფილი პრემიერი კი აცხადებს, რომ მისი მეგობრები დარწმუნებულები არიან, რომ ის მოწამლულია, რადგან მისი დაავადების ერთ-ერთი სიმპტომი ინტოქსიკაციაა. მას კი მიზეზად უსახელებენ ინფექციას, რომელიც დადგენილი არ არის.

ყოფილი პრემიერის მოწამვლის შესახებ ოჯახის წევრებმა და მისმა ადვოკატმა არაერთხელ ისაუბრა. ის რამდენჯერმე იყო გადაყვანილი საავადმყოფოშიც, თუმცა ოფიციალურად მოწამვლის შესახებ ინფორმაცია არ დადასტურდა.

ამავე თემაზე: