საქართველოს რუკის ტერიტორიული მთლიანობის დარღვევით დამზადება-გავრცელება, შესაძლოა, დასჯადი გახდეს. აღნიშნული ინიციატივა პარლამენტის თავდაცვის კომიტეტის თავმჯდომარეს, ქართული ოცნების დეპუტატს, ირაკლი სესიაშვილს ეკუთვნის.

On.ge-სთან საუბარში სესიაშვილმა განმარტა, რომ სისხლის სამართლის კოდექსს ერთი მუხლი დაემატება:

"საქართველოს ტერიტორიული მთლიანობის შემლახავი რუკის დაბეჭდვა, დამზადება, გავრცელება, რეკლამირება, სხვა საგანზე დამზადება, იმპორტი თუ ექსპორტი დაისჯება ჯარიმით ან თავისუფლების აღკვეთით 2 წლამდე ვადით".

დეპუტატის თქმით, ინიციატივა რუსული პროპაგანდის საპირწონედ მომზადდა:

"რუსეთი ცდილობს, საქართველოს რუკა შელახოს და გადააკეთოს. ეს არის წმინდა წყლის პროპაგანდა".

ირაკლი სესიაშვილის თქმით, კანონპროექტი პარლამენტს უახლოეს დღეებში წარედგინება.