ხურვალეთში რუსი სამხედროების მიერ დაკავებული მაია ოთინაშვილი უკვე სახლშია და ჟურნალისტებთან მისი გატაცების დღეს იხსენებს. ჰყვება, რომ საქართველოს კონტროლირებადი ტერიტორიიდან ძალის გამოყენებით წაიყვანეს, თუმცა შემდეგ ძალადობას ადგილი არ ჰქონია:

"აქედან თვალებახვეული გადამიყვანეს რუსების ბაზაზე. იქ ვიყავი ერთი დღე, დილიდან საღამომდე. მერე ცხინვალში წამიყვანეს. არაფერს არ მეკითხებოდნენ, კარგად არ მესმოდა რუსული, მომიტანდნენ ფურცელს და მომაწერინებდნენ ხელს. მიდიოდნენ და მოდიოდნენ. მერე ვიყავი იზოლატორში 4 დღე. მეხუთე დღეს სასამართლო იყო, ერთთვიანი შემიფარდეს და მერე ციხეში ვიყავი 10 დღემდე. 6 თვე არ უნდა ჩაიდინოო... ჩემს ტერიტორიაზე ვიყავი და დანაშაული მე ჩავიდინე".

ოკუპირებულ ცხინვალში ე.წ. სასამართლო პროცესი დღეს, 9 ოქტომბერს გაიმართა და მას ერთი წლით პირობითი პატიმრობა მიუსაჯეს.

მაია ოთინაშვილი რუსმა სამხედროებმა 29 სექტემბერს გაიტაცეს. ის ქმართან და სამ შვილთან ერთად სოფელ ხურვალეთში ცხოვრობს. სახალხო დამცველის ინფორმაციით, რამდენიმე დღის განმავლობაში, ოჯახის წევრებს არ ჰქონდათ საკმარისი ინფორმაცია დაკავებულის ზოგადი მდგომარეობის და უსაფრთხოების შესახებ.

მისი გათავისუფლებისთვის გააქტიურებული იყო ცხელი ხაზი და ინფორმირებულები იყვნენ საერთაშორისო ორგანიზაციები.