პარტია საქართველო ხალხისათვის ერთ-ერთი ლიდერი მერაბ მეტრეველი ქართული ოცნების მიერ დასახელებულ მაჟორიტარი დეპუტატობის კანდიდატებს კრიტიკულად აფასებს და აცხადებს, რომ პარტიას "სერიოზული საკადრო კრიზისი" აქვს:

"ქართული ოცნება ამ დანაკლისის შევსებას ე.წ. ცნობადი სახეებით ცდილობს, მაგრამ ამ სიაში ფეხბურთელები რა პრინციპით მოხვდნენ ვერ გეტყვით".

მეტრეველი ინტერპრესნიუსთან საუბარში ოცნების ამ გადაწყვეტილებასაც აკრიტიკებს:

"მორაგბეები კიდევ გასაგებია, ისინი ხალხს უყვარს მაინც. ფეხბურთელებს კი ქართველი ხალხისთვის იმედგაცრუების მეტი არაფერი მოუტანიათ".

მეტრეველმა გაიხსენა საქართველოს ფეხბურთის ფედერაციის არჩევნები, რომელზეც ლევან კობიაშვილმა გაიმარჯვა:

"არ უნდა დაგვავიწყდეს, რა პირობებში გახდა ლევან კობიაშვილი ფეხბურთის ფედერაციის პრეზიდენტი. ეს იყო ქართული ოცნების მმართველობის დროს ჩატარებული ერთ-ერთი ყველაზე სამარცხვინო არჩევნები, სადაც თავის კანდიდატს ქართულმა ოცნებამ შსს-ს დახმარებით გაამარჯვებინა. გახსოვთ ერთი დელეგატი, რომელიც მის კონკურენტს აძლევდა ხმას დაიჭირეს და მანამ არ გამოუშვეს, ვიდრე გარანტიები არ მიიღეს. ეს ყველაფერი დაახლოებით ისეთივე სამარცხვინო იყო, როგორც ნაციონალური მოძრაობის დროს არჩეულ კანდიდატს გიორგი ნემსაძეს ერთ საათში რომ აიძულეს გადადგომა".

მერაბ მეტრეველმა აღნიშნა, რომ ქართული ოცნება ნაციონალური მოძრაობის მსგავსად, გასამარჯვებლად ძალოვან სტრუქტურებს იყენებს:

"ეს უკვე ფეხბურთის ფედერაციის არჩევნებზე გამოჩნდა. იმედია, ახლა კობიაშვილს და სხვებს რომ გაამარჯვებინონ, ამისთვის მათ კონკურენტებს არ დაიჭერენ".

საქართველოს ფეხბურთის ფედერაციის პრეზიდენტი ლევან კობიაშვილი 15 აგვისტოს, ქართული ოცნების მაჟორიტარი დეპუტატობის კანდიდატად, პრემიერმა, გიორგი კვირიკაშვილმა დაასახელა. კობიაშვილი ქართულ ოცნებას გლდანის 21-ე ოლქში წარადგენს.

ნაძალადევის მე-18 ოლქში ქართული ოცნების მაჟორიტარი დეპუტატობის კანდიდატად არის წარდგენილი ასევე ფეხბურთელი მიხეილ ყაველაშვილი.

თბილისში ქართული ოცნება-დემოკრატიული საქართველოს მაჟორიტარი დეპუტატობის კანდიდატები 15 აგვისტოს დასახელდა.