არასამთავრობო ორგანიზაცია სამართლიან არჩევნებს მიაჩნია, რომ ხელისუფლება არასამთავრობო ორგანიზაციებზე ზეწოლას ახდენს და მათი რეპუტაციის შელახვას ცდილობს. ამის შესახებ სამართლიანი არჩევნების წინასაარჩევნო პერიოდის მონიტორინგის შუალედურ ანგარიშშია ნათქვამი, რომელიც 2018 წლის 9-დან 30 სექტემბრამდე პერიოდს მოიცავს.

მონიტორინგის ანგარიშში ნათქვამია, რომ გარდა არასამთავრობოებისა, ხელისუფლება სადამკვირვებლო ორგანიზაციების დისკრედიტაციასაც ცდილობს.

"14 სექტემბერს კომუნიკაციების კომისიის თავმჯდომარემ კახა ბექაურმა პრესკონფერენცია გამართა და თავს დაესხა ჩვენს ორგანიზაციას გამოქვეყნებული ანგარიშის გამო. ბექაურის პრესკონფერენცია ცალსახად მიმართული იყო ორგანიზაციის საქმიანობის დისკრედიტაციისკენ",— ნათქვამია სამართლიანი არჩევნების მონიტორინგის დოკუმენტში.

ორგანიზაციის ცნობით, არასამთავრობოების დისკრედიტაციის მიზნით, განცხადებებს აკეთებენ მმართველი გუნდის ლიდერები, თბილისის მერი და მმართველი გუნდის მიერ მხარდაჭერილი საპრეზიდენტო კანდიდატი, სალომე ზურაბიშვილი. მონიტორინგის ანგარიშში საუბარია საქართველოს პარლამენტის თავმჯდომარის ირაკლი კობახიძის განცხადებაზე, რომლის მიხედვითაც არასამთავრობო ორგანიზაციები პოლიტიკურად მართული ჯგუფია.

"არასამთავრობო სადამკვირვებლო ორგანიზაციებზე მსგავსი კოორდინირებული თავდასხმა წინასაარჩევნო პერიოდში წარმოადგენს ხელისუფლების მხრიდან არასამთავრობო ორგანიზაციებზე ზეწოლას, მათი საქმიანობის შეზღუდვისა და საქმიანი რეპუტაციის დაზიანების მცდელობას, რაც, თავის მხრივ, წარმოადგენს საფრთხეს სახელმწიფოს დემოკრატიული განვითარებისათვის", — ვკითხულობთ ანგარიშში.