საგანგებო სიტუაციების მართვის სამსახური საქართველოს შინაგან საქმეთა სამინისტროს დაქვემდებარებაში ბრუნდება. შესაბამისი კანონპროექტი დღეს, 8 ოქტომბერს საქართველოს პარლამენტის ბიუროს წარედგინა.

შსს-ს მიერ ინიცირებული პროექტის მიხედვით, საგანგებო სიტუაციების მართვის სამსახური სამინისტროს დაქვემდებარებაში საქვეუწყებო დაწესებულების სტატუსით გადადის.

საქართველოს საგანგებო სიტუაციების მართვის სამსახურის ხელმძღვანელის მოვალეობის შემსრულებლის, შალვა ხუციშვილი განმარტავს, რომ ცვლილებები მცირე მთავრობის კონცეფციას უკავშირდება. მისივე თქმით, უწყებაში თანამშრომლების მასშტაბური შემცირება არ იგეგმება, თუმცა იქნება ეფექტი ხარჯების დაზოგვის კუთხით.

2018 წლის დასაწყისში საკანონმდებლო ცვლილებების საფუძველზე, სახელმწიფო უსაფრთხოებისა და კრიზისების მართვის საბჭო გაუქმდა. შეიქმნა ახალი სტრუქტურა, საგანგებო სიტუაციების მართვის სამსახური, რომლის ხელმძღვანელად შსს-ს ყოფილი მინისტრი, გიორგი მღებრიშვილი დაინიშნა. სტრუქტურული ცვლილებების ფარგლებში, საგანგებო სიტუაციების მართვის სააგენტო შსს-ს გამოეყო და მღებრიშვილის უწყებას შეუერთდა. საგანგებო სიტუაციების მართვის სამსახური ამჟამად პრემიერ-მინისტრის დაქვემდებარებაშია.