ამერიკის შეერთებული შტატების საელჩო საქართველოში ეხმაურება რუსულ მედიაში გავრცელებულ ინფორმაციას ლუგარის ლაბორატორიასთან დაკავშირებით და მას სრულ აბსურს უწოდებს. საელჩოს განცხადებით, ეს რუსული დეზინფორმაციისა და პროპაგანდის ნათელი მაგალითია.

საელჩოში ამბობენ, რომ გერმანიის მხარდაჭერით, საქართველო ნოემბერში აწყობს საერთაშორისო კონვენციასთან შესაბამისობის სავარჯიშოს ლუგარის ცენტრში, რომელზე დასწრებაზეც რუსულმა მხარემ უარი განაცხადა.

რუსეთის თავდაცვის სამინისტრომ პენტაგონი საქართველოს ტერიტორიაზე ბიოლოგიური იარაღის შექმნაში დაადანაშაულა. პენტაგონის წარმომადგენელმა, ერიხ პაჰონმა ბრალდებები უარყო და დასავლეთის წინააღმდეგ გავრცელებული დეზინფორმაცია უწოდა. ქართულმა მხარემ კი ეს ინფორმაცია სიცრუედ და ბოდვად შეაფასა.

რუსეთის ბრალდებების საპასუხოდ, დაავადებათა კონტროლის ცენტრმა პრესკონფერენცია გამართა. ცენტრის გენერალურმა დირექტორმა, ამირან გამყრელიძემ განაცხადა, რომ ბოლო სამ კვირაში ლუგარის ცენტრისა და ჯანმრთელობის საკითხების მიმართ რუსული პრესა განსაკუთრებით გააქტიურდა. მისივე თქმით, რუსეთის ოფიციალური პირებისა და მედიის მხრიდან გავრცელებული ინფორმაცია მტკნარი სიცრუეა.

ეს არ არის პირველი შემთხვევა, როდესაც რუსული მხარე ლუგარის ცენტრს პროპაგანდისთვის იყენებს.

გაიგეთ მეტი: