ბათუმის საჭადრაკო ოლიმპიადის ფარგლებში, რუსეთის, ხანტი-მანსიინსკის დელეგაციის სასაჩუქრე პარკებში მინიატურულ რუკებზე საქართველო აფხაზეთისა და ცხინვალის გარეშე იყო დატანილი. ამის შესახებ ინფორმაცია საქართველოს ჭადრაკის ფედერაციამ გაავრცელა. მინიატურული რუკის ამსახველ ფოტოზე ჩანს, რომ აფხაზეთი და ცხინვალი რუსეთის შემადგენლობაშია.

ფედერაციის ცნობით, ბათუმის საჭადრაკო ოლიმპიადას, სადაც ჭადრაკის საერთაშორისო ფედერაციის პრეზიდენტი აირჩიეს, ესწრებოდა რუსეთიდან, კერძოდ ხანტი-მანსიინსკიდა ჩამოსული დელეგაციაც.

"საქართველოს ჭადრაკის ფედერაციას მიუღებლად მიაჩნია, სპორტულ ღონისძიებაზე პოლიტიკური ელემენტების შემოტანა, განსაკუთრებით მაშინ, როცა საქმე ეხება საქართველოს ტერიტორიული მთლიანობისა და სუვერენიტეტის შელახვას", — ნათქვამია ჭადრაკის ფედერაციის განცხადებაში.

რუსეთის ჭადრაკის ფედერაციის გენერალურმა დირექტორმა, მარკ გლუხოვსკიმ, პირველ არხთან ხანტი მანსიისკის დელეგაციის მიერ დარიგებულ რუკებზე საუბრისას განაცხადა, რომ რუკის მომზადების დროს პატარა ქვეყნის ტერიტორიებისთვის ყურადღება არავის მიუქცევია.

"არაფერი განსაკუთრებული არ მომხდარა. ჩვენ აქ ჭადრაკის გამო შევიკრიბეთ და არა პოლიტიკური განცხადებებისთვის. რუკის მომზადების დროს ყურადღება პატარა ქვეყნის ტერიტორიებისთვის არავის მიუქცევია. ეს არ იყო გამიზნული ქმედება. საქართველო რუკაზე საერთოდ არ ჩანს და საერთოდ რატომ გაქვთ პრეტენზიები. ეს ჭადრაკის საერთაშორისო რუკაა. პოლიტიკური რუკა არ არის", — თქვა გლუხოვსკიმ.

ბათუმის საჭადრაკო ოლიმპიადაზე მომხდარ ფაქტს გამოეხმაურა ქართული ოცნების დეპუტატი, გია ვოლსკი. მისი თქმით, რუსულ მხარეს ბოდიში აქვს მოსახდელი, თუ ეს პოლიტიკური განაცხადი იყო.

"საერთოდ, ვფიქრობ, კანონიც არ გვაწყენდა, რომ საქართველოს ტერიტორიაზე და ზოგადად იქ, სადაც ჩვენ ხელგვეწიფება, გავლენა ვიქონიოთ. პასუხისგებაში უნდა მივცეთ ის პირები, რომლებიც ასეთ დემარშს მოაწყობენ ქვეყნის ტერიტორიული მთლიანობის წინააღმდეგ", — აცხადებს გია ვოლსკი.