პრემიერმა გიორგი კვირიკაშვილმა მთავრობის სხდომაზე განაცხადა, რომ გაზრდილი მგზავრთა ნაკადის მომსახურებისთვის, ქუთაისის საერთაშორისო აეროპორტში დამატებითი ინფრასტრუქტურის მშენებლობა იგეგმება, რომელსაც 23 სექტემბრიდან, ევროპისკენ 7 მიმართულება ემატება.

პრემიერ მინისტრი იმედოვნებს, რომ საქართველო წელს, უვიზო მიმოსვლასთან დაკავშირებით, საბოლოო გადაწყვეტილებას მიიღებს და ეს ორი მოვლენა კონტექსტში, ქუთაისიდან, ევროპის ჯამში 11 მიმართულებით, შეღავათიან ფასად მგზავრობის საშუალებას შექმნის.

ამას გარდა, პრემიერის თქმით, ამბროლაურში აეროდრომის მშენებლობის დასრულება წლის ბოლოსთვის იგეგმება:

"ეს ძალიან მნიშვნელოვან ბიძგს მისცემს მთლიანად რაჭაში ტურიზმის განვითარებას. ვფიქრობთ, წლის ბოლომდე დავასრულებთ აეროდრომის სამუშაო მდგომარეობამდე მიყვანას და დასრულებული იქნება ასაფრენ-დასაფრენი ზოლი, შესაძლოა, ტერმინალის იმ მდგომარეობამდე მიყვანაც, რომ მგზავრების მიღება მოხერხდეს".

აეროპორტის მშენებლობის, აღჭურვის და ოპერირებაში შეყვანის მიზნით განსახორციელებელი ღონისძიებების სწრაფად შესრულების მიზნით, მთავრობა გამარტივებულ შესყიდვას მიმართავს.