ომეგა ჯგუფის დამფუძნებელი ზაზა ოქუაშვილი ითხოვს, რომ ის არა საქართველოში, არამედ ლონდონში გამოიკითხოს. ომეგა ჯგუფის საქმეზე ოქუაშვილი პროკურატურაში გამოკითხვაზე 4 ოქტომბერს მეორედ იყო დაბარებული. პირველ ჯერზე ის გამოკითხვაზე არ მივიდა, რადგან ქვეყანაში არ იყო.

როგორც ბიზნესმენის ადვოკატი, გიორგი ფანცულაია ამბობს, მისი დაცვის ქვეშ მყოფი მზად არის გამოძიებას ყველა ინფორმაცია მიაწოდოს. მისივე თქმით, სისხლის სამართლის საპროცესო კანონმდებლობა სხვა ქვეყანაში გამოკითხვის საშუალებას ძლევა:

"ის, რომ დღეს ვერ ჩამოდის და საქართველოში ვერ აძლევს ის ინფორმაციას, ეს არის იმ აბსურდული მდგომარეობით, რომ არათუ ბრალდებულებისთვის წარმოადგენს საშიშროებას საქართველოში ყოფნა, არამედ წარმოადგენს დაზარალებულებისათვის".

ომეგა ჯგუფის საქმე

10 სექტემბერს რუსთავი 2-მა გაავრცელა ჩანაწერები, რომლებშიც, სავარაუდოდ, სპორტის ყოფილი მინისტრი ლევან ყიფიანი და ომეგა ჯგუფის დამფუძნებელ ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა. ორი კვირის შემდეგ პროკურატურამ ომეგა ჯგუფის საქმეს კიდევ რამდენიმე ჩანაწერი დაურთო.

სასამართლოში გამოკითხვის შემდეგ ლევან ყიფიანმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელმა, ზაზა ოქუაშვილმა მასთან შეთანხმებით ჩაწერა.

მისი თქმით, ამ ჩანაწერებზე დათანხმების მიზანი იყო, რომ ოქუაშვილს საქართველოში და საზღვარგარეთ ფინანსური პრობლემები მოეგვარებინა. მისი განმარტებით, ჩანაწერებით უცხოელი პარტნიორები სახელმწიფოს მიერ ომეგა ჯგუფზე ზეწოლის შესახებ შეიტყობდნენ, ოქუაშვილი კი ამ დროს საქართველოში ბიუჯეტის მიმართ არსებულ დავალიანების საკითხსაც გადაჭრიდა. თუმცა როგორც ყიფიანი განმრატავს, ის აუდიოჩანაწერები, რომელც მედიით გავრცელდა დამონტაჟებულია.

ლევან ყიფიანის ადვოკატის განცხადებით, ისინი გეგმავენ, რომ ოქუაშვილს სასამართლოში უჩივლონ.