ქართული ოცნების თავმჯდომარისა და ყოფილი პრემიერ-მინისტრის ბიძინა ივანიშვილის თქმით, აგვისტოს ომის დროს მესამე პრეზიდენტი, მიხეილ სააკაშვილი ქვეყანაში რუსულ ჯარს შემოუძღვა.

"გახსოვთ, როგორ იქცეოდნენ, როგორ მიატოვეს დახოცილი ჯარისკაცები, როგორ უპატრონოდ, ტყეში დატოვეს ცოცხალი ჯარი. სწორედ ეს თემა აქვთ ყველაზე მეტად წინა პლანზე წამოწეული. ყველაზე დიდი დანაშაული, რაც ჩაიდინეს, ცდილობენ გადმოიტანონ და ჩვენ დაგვაბრალონ და მიაბრალონ საპრეზიდენტო კანდიდატ სალომე ზურაბიშვილს", — განაცხადა ბიძინა ივანიშვილმა პარტიის შეხვედრაზე.

მმართველი გუნდის შეხვედრა არჩევნებში გამარჯვებიდან ექვსი წლის თავზე გაიმართა. საგანგებო ბრიფინგის დროს მმართველმა პარტიამ საქართველოს ტერიტორიების დაკარგვაში ნაციონალური მოძრაობა დაადანაშაულა. პარტიის გენერალური მდივნის, კახა კალაძის განცხადებით, ნაციონალურმა მოძრაობამ ოკუპირებული რეგიონები რუსეთს თავად ჩააბარა.

"მათ ომში მარცხი ჯერ გამარჯვებად მონათლეს და რუსთაველის გამზირზე აზეიმეს ხალხს, შემდეგ კი მსხვერპლის როლი მოირგეს, მაგრამ, პარალელურად, ევროპის საბჭოს საპარლამენტო ასამბლეის იმ რეზოლუციას მისცეს ხმა, სადაც რუსეთის ინტერვენცია კონტრშეტევად არის შეფასებული", — განაცხადა კალაძემ.